“Aidiyyatı üzrə cəlb edilmiş ekspertlərin yekun fikirləriylə tanış olduq. Nəticə bizim üçün sürpriz olmadı. Loru dildə desək, səbəb məhz təbii fəlakətdi. Hər halda, aşan dirək kustar üsulla hazırlanmayıb. Yəni müəyyən yoxlama və monitorinq işlərindən sonra istifadə üçün yararlı sayılıb. Ümumiyyətlə, dirəklərlə bağlı hansısa çatışmazlıq aşkarlanmadı. Nə bünövrədə, nə də materialda. Problemin həll edilməsi istiqamətində yol xəritəmiz hazırdı. Təxminən ayyarım, ola bilsin, iki ay ərzində təmir-bərpa prosesini yekunlaşdırmağı düşünürük. Belə ki, aşan və ona paralel olan, yəni tribunaların yaxınlığında olan dirəklər yeniləriylə əvəz ediləcək. Artıq bunun üçün axtarışa başlamışıq. İlkin hədəf yeni dirəklərin ölkə xaricindən gətirilməsidi. Alınmasa və bunun uzun müddət çəkəcəyi ortaya çıxsa, B planı kimi ölkəmizdən almağı düşünürük. Qarşıdakı iki dirəkdə isə möhkəmləndirmə işləri görüləcək. Problem tam aradan qaldırılana qədər ev oyunlarını gündüz keçirəcəyik. Bütün kollektiv səfər olunub ki, məqsədimizə tez çataq və əvvəlki kimi doğma meydanda axşam saatlarında komandamızın oyununu izləyə bilək”.