Misli premyer-liqasının 20-ci turunda “Araz-Naxçıvan” “Sumqayıt”ı qəbul edib - 1:1.

“Football-plus.az” xəbər verir ki, matçdan sonra meydan sahiblərinin çalışdırıcısı Azər Bağırovun mətbuat konfransı keçirilib. Sizi onun fikirləri ilə tanış edirik:

- Komanda 3 matçdı qələbə qazana bilmir. Çıxış yolunu nədə görürsünüz?
- Yeni qurulmuş komandayıq. Səhvlərimiz ola bilər. Hələ hər şey qabaqdadı. Bu gün 27 xal toplamışıqsa, meydanda futbol görürüksə, bu, sevindirici haldı. Bəli, qolları vura bilmirik. Problemlərimiz burdadı. Çalışacağıq ki, bunları aradan qaldıraq. Hər oyunda çoxlu qol epizodları yaradırıq. Bizim qapıda isə iki epizoddan biri qola çevrilir. Komanda meydanda istədiyim futbolu göstərir.

- İlk hissədə rəqib sizdən daha yaxşıydı. Fasilədə nəyi dəyişdiz ki, komanda meydanda rəqibi üstələyirdi?
- Mənə elə gəlir ki, ilk yarıda da rəqibdən üstün idik. Standart vəziyyətdən qapımızda qol olmasaydı... Hücumlarımız kəsərli idi. Rəqib qapıda daha çox biz idik. Ola bilər ki, külək amili var idi. "Sumqayıt" küləyə qarşı oynayırdı. Xırda bir məsələ var ki, onu birinci hissədə az edirdik. Uşaqlar ikinci hissədə mənim istədiyim futbolun 80 faizini oynadılar.