"Qarabağ"la oyuna xal qazanmaq üçün çıxacağıq"
“Kəpəz”in futbolçusu Vüsal Məsimov klubun mətbuat xidmətinə açıqlama verib.
"Football-plus.az" xəbər verir ki, 23 yaşlı müdafiəçi əvvəlcə Misli premyer-liqasının 19-cu turunda "Turan Tovuz"a 2:1 hesabı ilə qalib gəlməkləri haqda danışıb:
“Ağır oyun olacağını bilirdik. Gözlədiyimiz kimi də keçdi. Çünki Qərb derbisi həmişə ağır olur. Həm azarkeş baxımından, həm də atmosfer baxımından. Qələbə qazandığımız üçün çox sevincliyik”.
O, 20-ci turda "Qarabağ"a qarşı keçirəcəkləri matç barədə də fikirlərini bölüşüb:
“Qarabağ”la matça çox yaxşı hazırlaşırıq. Onların gücü hər kəsə bəllidi. Çempionatda liderlik edirlər. Buna baxmayaraq, çalışacağıq ki, öz gücümüzü göstərək. Meydana xal qazanmaq üçün çıxacağıq".
Vüsal ev oyunlarında maksimum xal qazanmağa çalışacaqlarını dilə gətirib:
"Düzdü, "doğma divarlar" arasında oynamayacağıq. Ancaq azarkeşlərimiz Qəbələdə də bizi tək qoymurlar. Xüsusən ev matçlarında maksimum xal toplamağa çalışacağıq".
Qeyd edək ki, sabah keçiriləcək “Kəpəz” - “Qarabağ” oyunu saat 15.00-da başlayacaq.
Digər xəbərlər
