"Kəpəz"in yarımmüdafiəçisi Nicat Süleymanov “Qarabağ” ilə oyun öncəsi klubun mətbuat xidmətinə açıqlama verib.

O, ağdamlılarla matçı dəyərləndirib: "Bizi həddindən artıq çətin oyun gözləyir. Bunun fərqindəyik. Layiqli şəkildə mübarizə aparmağa çalışacağıq. Çempionatda asan görüş yoxdu. Bütün qarşılaşmalar gərgin keçir. “Qarabağ” qarşısında nə gücümüz varsa, ortaya qoymağa çalışacağıq. Hamı rəqibin gücünə bələddi. Bununla belə meydana xal qazanmaq üçün çıxacağıq. Komandamızda hər şey yaxşıdı. “Səbail” üzərində qazandığımız qələbədən sonra əhval-ruhiyyəmiz daha da artıb. Gəncədəki oyunu unudub qarşıdakı matça köklənmişik. Meydana çıxıb-çıxmayacağım baş məşqçinin qərarından asılıdı. Onun qərarına hörmətlə yanaşıram. Kimin oynamasından asılı olmayaraq əsas olan komandanın nəticəsidi. Meydanda mənə nə qədər şans düşsə, istifadə edib etimadı doğrultmağa çalışacağam. Sağ və sol cinahda oynamaq mənim üçün ilk dəfə deyil. Bu mövqelərdə özümü yad hiss etmirəm. Milli komandalarda dəfələrlə cinahlarda oynamışam, özümü pis də göstərməmişəm. Əsas yerim yarımmüdafiənin mərkəzidi. Baş məşqçi hansı mövqedə güvənsə, orda da çıxış edə bilərəm".