“Qəbələ” nominal qonaq sayılsa da, doğma meydanda 1-ci liqada liderlər qrupunda qərarlaşan “İmişli”ni qəbul edirdi.

Oyunun “qırmızı-qaralar”ın üstünlüyü şəraitində keçəcəyini və böyükhesablı qələbənin qeydə alınacağını gözləyənlər çox idi. Adətən, Azərbaycanda yuxarı və aşağı liqa təmsilçilərinin oyununda sonluq belə olur. Cəmi 70 (!) azarkeşin izlədiyi oyunda belə olmadı...

Qətiyyən özünə gələ bilməyən “Qəbələ” rəqibini çətinliklə məğlub etdi. “Qırmızı-qaralar” “İmişli”nin “alınmaz qala” təsiri bağışlayan müdafiə xəttini yarmaq üçün 90 dəqiqədən artıq döyüşməli oldu. Əslində Elmar Baxşıyevin komandası xeyli qol vəziyyəti yaratdı. Lakin Xalayla ardıcıl bir neçə dəfə hesabı açmaq imkanını əldən verdi. İsrailli hücumçu gah fürsətləri sağa-sola xərclədi, gah da Mehman səddini keçə bilmədi. Ümumiyyətlə, meydanda gərgin rəqabət var idi. Komandaları tanımayan ya 1-ci liqa, ya da premyer-liqa klublarının qarşılaşmasını izlədiyini düşünərdi. İkinci hissədə də bu mənzərəyə şahid olduq. “Qəbələ”dən Tetteh, Bilel, Lukas və Osama dəfələrlə rəqibin qapısı önündə təhlükə yaratsa da, Əsgər Abdullayevin komandasının müdafiəçiləri inamlı çıxış etdi. Qəbələlilər bitirici zərbələrdə qətiyyən dəqiq oynamırdı. Matçın taleyini həll edən qol isə 90+3-cü dəqiqədə vuruldu. Allaş, nəhayət, müdafiəçiləri aldadaraq topu Asifə çatdırdısa, sonuncu Mehracı vaxtında gördü. Gənc yarımmüdafiəçi yerində dönərək qüvvətli zərbəylə komandasına qələbə qazandıran qolu vurdu. Son dəqiqələrdə başqa təhlükəli vəziyyət olmadı. “Qəbələ” çətinliklə də olsa, ölkə kubokunun 1/4 finalına vəsiqə qazandı.

Gözdən qaçmadı
* Oyun 3 dəqiqə gec başladı
* “İmişli”ni azsaylı “Küdrü qartalları” azarkeş qrupu dəstəkləyirdi. “Qəbələ”nin “Red Black Army” fanklubu isə vaxtaşırı “Elmar, möhkəm ol, biz burdayıq” şüarıyla baş məşqçiyə motivasiya verirdi.

KƏNAN BAHADIR