Cordan Henderson ilə bağlı iki müxtəlif xəbər yayılıb.

Onun tezliklə Səudiyyə Ərəbistanından ayrılacağı bildirilir.

Canluka Di Martsio təcrübəli futbolçunun İtaliyaya yollanacağını xəbər verib. Tanınmış insayder ingilis yarımmüdafiəçinin “Yuventus”un hədəfində olduğunu və Turin klubunun onu mövsümün sonuna qədər icarəyə götürməyi planlaşdırdığını bildirib. Di Martsio səbəbkarın qarşı tərəfdən 18 aylıq müqavilə istədiyini də xəbər verib.

Asiya ölkəsinin iqlimini bəyənməyən Cordanın Avropaya qayıtmaq istədiyi məlumdu. “Əl-İttifaq”ın heyətində 19 oyun keçirən və 5 məhsuldar ötürmə edən futbolçunun “Ayaks”a keçməyə yaxın olduğunu isə “The Athletic” qəzeti xəbər verib. Bu mənbənin məlumatında 33 yaşlı yarımmüdafiəçinin həftənin sonuna qədər Amsterdam klubunda tibbi müayinədən keçəcəyi bildirilib.

Qeyd edək ki, “Əl-İttifaq”ın baş məşqçisi “Liverpul”un əfsanəvi futbolçusu Stiven Cerrarddı. O, ötən ilin yayında keçmiş oyundaşını öz komandasına aparmışdı. Lakin Henderson artıq Səudiyyə Ərəbistanında yaşamaq istəmir.