Bildiyiniz kimi, Misli premyer-liqasında yaranan qış fasiləsindən istifadə edən komandalardan 5-i ölkədə qalsa da, 5-i təlim-məşq toplanışlarını keçmək üçün Türkiyəyə yollanmışdı.

Antalyada toplaşan klublarımız – “Neftçi”, “Sabah”, “Səbail”, “Sumqayıt” və “Turan Tovuz” yoxlama görüşlərini yekunlaşdırıb.

Təlim-məşq toplanışında olan komandalarımız bu müddətdə 11 yoxlama matçı keçirdi. Bu qarşılaşmaların yalnız ikisində qələbə qazanıldı. Ümumilikdə klublarımız toplanış dönəmini 2 qələbə, 1 heç-heçə və 8 məğlubiyyət ilə başa vurdu. 24 qol buraxan klublarımız rəqib qapılarından, sadəcə, 9 top keçirə bildi.

Neftçi
Mövsümə heç də yaxşı başlamayan “ağ-qaralar” ilin sonuna sayılı günlər qalmış baş məşqçisi Adrian Mutu ilə yollarını ayırdı. Tanınmış rumıniyalı çalışdırıcının fəaliyyəti cəmi 5 ay çəkdi. Qış fasiləsi başlamamış komandaya yeni çalışdırıcı Miodroq Bojovic təyin edildi. Onun rəhbərliyi altında 2 yoxlama matçı keçirən flaqman qələbə qazana bilmədi. İlk oyunda Türkiyənin “Ərzurumspor” komandasına 1:3 uduzan “ağ-qaralar” ikinci hazırlıq görüşündə Almaniyanın üçüncü liqa təmsilçisi “Vadhof”la qarşılaşdı. Bu oyun da almanların böyükhesablı qələbəsi (3:0) ilə başa çatdı.

Sumqayıt
Misli premyer-liqasında ilk yarını 4-cü pillədə başa vuran Samir Abasovun yetirmələri Antalyada həm qələbə qazandı, həm də məğlub oldu. İlk oyunda Rumıniya “Hermanştadt”ına 0:3 məğlub olsalar da, ikinci yoxlama oyununda Özbəkistan “Soqdiana”sını 3:1 hesabıyla üstələdilər. Bununla da ikinci yarıya qalib əhval-ruhiyyəsində çıxmağı bacardılar.

Səbail
Turnir cədvəlinin 5-ci pilləsində qərarlaşan Şahin Diniyevin komandası ilk görüşü Rumıniyanın elita təmsilçisi “Universitatya Kluj”a qarşı keçirdi. Rumınların mübarizə əzmini qıra bilməyən “dənizçilər” matçı qolsuz bərabərliklə bitirdilər – 0:0. Son hazırlıq oyununda Rusiya “Fakel”inə 1:2 hesabıyla məğlub olan “Səbail” fasiləni 1 heç-heçə, 1 məğlubiyyətlə başa vurdu.

Sabah
Murad Musayevin rəhbərlik etdiyi Masazır təmsilçisi ötən mövsümü 2-ci pillədə başa vursa da, bu mövsüm turnir cədvəlinin zirzəmisindədi. İlk yarıdan sonra hesabında 22 xal olan “bayquşlar” 8-ci pillədə qərarlaşıb. Birnici yoxlama matçında Buxarest “Rapid”ini sınağa çəkən “Sabah” Türkiyədə yoldaşlıq oyunları keçirən klublarımız arasında ilk qələbini qazandı – 2:1. Amma ikinci oyunda Ukraynanın elita klubu “Vorskla” Musayevin komandasını darmadağın etdi – 3:0.

Turan Tovuz
Ayxan Abbasovun komandası digər klublarımızdan fərqli üç yoxlama görüşü keçirdi. İlk matçda Rumıniya “Voluntari”sinə 2 cavabsız qolla uduzan tovuzlular Macarıstanın “Şiofok”uyla qarşılaşmada da eyni nəticə ilə üzləşdi – 0:2. Üçüncü – sonuncu yoldaşlıq görüşündə Özbəkistan “Nasaf”ı ilə qarşılaşan “bozqurdlar” fasilədə qələbəyə həsrət qaldı – 2:4.

1. Sumqayıt 2 1 0 1 3-4 3
2. Sabah 2 1 0 1 2-4 3
3. Səbail 2 0 1 1 1-2 1
4. Neftçi 2 0 0 2 1-6 0
5. Turan Tovuz 3 0 0 3 2-8 0

Fasilədə ölkədə qalan komandaların yoldaşlıq oyunlarının nəticələri:
Qəbələ - Kəpəz 1:2
Zirə - Araz-Naxçıvan 2:1
Qəbələ - Araz-Naxçıvan 2:0
Qarabağ – Zirə 4:0

KAMAL SƏFƏR