“Turan Tovuz” uduzdu, Ayxan Abbasov baxışda olanları bəyənmədi
Türkiyədə təlim-məşq toplanışında olan komandalardan “Turan Tovuz” dünən iki yoldaşlıq oyunu keçirdi. Antalyada keçirilən hər iki görüş Tovuz təmsilşisinin məğlubiyyəti ilə yadda qaldı.
Əsasən baxışda olanlardan və gənc futbolçularından ibarət heyət Bakı vaxtı ilə saat 12-də start götürən günün ilk yoxlama matçında Macarıstanın elita təmsilçisi, turnir cədvəlində 16-cı yerdə qərarlaşan “Şiofok”la qarşılaşdı. Görüş macarların 2:0 hesablı qələbəsi ilə başa çatdı. Tovuzluların baş məşqçisi Ayxan Abbasov matçdan sonra oyunçularından narazılığını gizlətmədi:
“Günün ilk oyununda az oynayanlara və baxışdan keçənlərə şans verdik. Axşam daha bir matçımız var və ümid edirəm ki, zədəsiz ötüşərik. Nadir hallarda oynayanları 90 dəqiqə ərzində iş başında görmək vacib idi. Onların hazır olmadığı bizə aydın oldu. Martin Petkovla Belajdi Pusinin 90 dəqiqə meydanda qalması vacib idi. Tərlan Quliyev, Sadiq Quliyev və Şəhriyar Əliyev də oynamaq imkanı qazandı”.
Tovuzlular saat 17.00-da eyni meydançada Özbəkistanın elita təmsilçisi, 26 oyundan sonra 48 xalla 2-ci pillədə qərarlaşan “Nasaf”la üz-üzə gəldi. Abbasov bu dəfə meydana əsas heyəti buraxmışdı. Hakimin start fitindən cəmi 90 saniyə sonra “Turan Tovuz” hesabı açdı. İsmayıl Zülfüqarlı fərqləndi. Amma özbəklər 15-ci dəqiqədə hesabı bərabərləşdirməyə nail oldu - 1:1. Qolun təsirindən ayılmayan “bozqurdlar” iki dəqiqə sonra qapısında növbəti topu gördü - 1:2. Abbasovun komandası fəallığı, hücumların kəsərliliyini artırmaq istəsə də, 20-ci dəqiqədə rəqibin 20 nömrəli futbolçusu həm özünün, həm də komandasının üçüncü qoluna imza atdı – 1:3. İki dəqiqə sonra hakim əllə oyuna görə özbəklərin qapısına penalti təyin etsə də, Fərid şansı dəyərləndirə bilmədi. Matçın baş hakimi 31-ci dəqiqədə növbəti dəfə “nöqtə”ni göstərdi. Bu dəfə rəqibə kobud müdaxilə etdiyinə görə “Turan Tovuz”un qapısına təyin olunan penaltini Kamal dəf etdi. İlk yarı bu hesabla yekunlaşdı. İkinci hissə tovuzlular üçün yaxşı başladı. 51-ci dəqiqədə Roderik Miller fərqi minimuma endirdi – 2:3. Təəssüf ki, tovuzlular nəinki hesabı bərabərləşdirə bilmədilər, hətta qapılarında dördüncü qolu gördülər. Oyuna sonradan qoşulan “Nasaf”ın 19 yaşlı forvardı Şəhzad 72-ci dəqiqədə yenidən hesab arasındakı fərqi artırdı – 2:4. Oyunda başqa qol olmadı. Beləliklə,”Turan Tovuz” Türkiyədə keçirdiyi üç yoxlama matçının heç birində qalib gələ bilmədi. Ayxan Abbasovun meydana buraxdığı əsas heyət: Kamal Bayramov (k), Emmanuel Hakman, Bruno Qonçalves, Roderik Miller, Fərid Nəbiyev, Fərid Yusifli, Xəyal Nəcəfov, İsmayıl Zülfüqarlı, Denis Marandiçi, Luis Paçu, Oto Con.
Ehtiyat oyunçular: Tərlan Əhmədli, Aydın Bayramov, Aleks Souza, Faiq Hacıyev, Tərlan Quliyev, Sadiq Şəfiyev, Cavid Qasımov.
KAMAL SƏFƏR
Digər xəbərlər
