Türkiyədə təlim-məşq toplanışında olan klublarımızın siyahısında “Turan Tovuz” da var. “Bozqurd” mövsümün ikinci yarısında daha iddialı çıxış etmək niyyətindədi. Bu məqsədlə qardaş ölkədə ciddi hazırlıq prosesi və yoxlama oyunlarının həyata keçirilməsi nəzərdə tutulub. Artıq dünən ilk görüş reallaşıb. Düzdü, bu oyun əslində srağagün keçirilməliydi. Lakin tərəflər əlverişsiz hava şəraiti üzündən dünən qarşılaşmalı oldu. Rəqib Rumıniya superliqasının 13-cü pilləsində qərarlaşan “Voluntari” idi.

Ayxan Abbasov start heyətində bu futbolçulara güvəndi:

Tərlan Əhmədli, Tərlan Quliyev, Bruno Qonçalves, Paçu Lira, Xəyal Nəcəfov, Ayxan Hüseynov, Slavik Alxasov, Emmanuel Hakman, Oto Con, Faiq Hacıyev, Veysəl Rzayev.

Ehtiyat oyunçular: Aydın Bayramov, Sadiq Quliyev, Şəhriyar Əliyev, Denis Marandiçi, Martin Petkov, Belajdi Pusi, Fərid Nəbiyev, Eltun Turabov, Sadiq Şəfiyev, Cavid Qasımov.

Tovuzlular matça daha istəkli və dinamik başladı. Onlar rəqibi tez-tez meydanın özünə aid hissəsinə sıxışdırır və təhlükəli vəziyyətlər yaradırdı. İlk hissədə daha üstün görünən Tovuz təmsilçisi ikinci yarıda edilən rotasiyalardan sonra sanki gücdən düşdü. Belədə “Voluntari” rəqibi əks-hücumlarda yaxalayıb qollar vurmağı bacardı. Daniel Florea 48-ci dəqiqədə müdafiəçiləri çaş-baş salaraq hesabı açdı. Bundan sonra “Turan Tovuz” hücumda fəallaşsa da, faydalı iş əmsalı aşağı idi. Nəticədə komanda 71-ci dəqiqədə qapısında növbəti qolu gördü. Bu dəfə David Anxelo fərqləndi. Beləliklə, oyun tovuzluların 0:2 hesablı məğlubiyyətiylə yekunlaşdı. Maraq üçün xatırladaq ki, 2018-ci ildə Ayxan Abbasovun çalışdırdığı “Zirə” məhz bu rəqiblə yoxlama oyununda 2:0 hesabıyla qalib gəlmişdi.

Qeyd edək ki, “Turan Tovuz” yanvarın 15-də daha iki yoxlama oyunu keçirəcək. Tovuzlular Macarıstanın “Şiofok” və Özbəkistanın “Nasaf” komandaları ilə üz-üzə gələcək.

KƏNAN BAHADIR