Ceyhun Nuriyev “Sabah”da çoxlarının gözləmədiyi şəkildə sıçrayış etdi.

Futbolçu əvvəlcə “bayquşlar”ın heyətində tez-tez şans qazanmağa başladı. Sonra Milan Obradoviç onu U-21-ə çağırdı. Nəhayət, ötən mövsüm özünü yaxşı tərəfdən göstərən gənc vingeri ölkənin əsas komandasına da cəlb etdilər. Amma Ceyhunun zəfər təntənəsi uzun sürmədi və cari mövsümdə bəxti gətirmədi. Bu mövsüm Masazır təmsilçisində cəmi 5 oyunda (3 premyer-liqa, 2 avro kubok matçı), 99 dəqiqə meydanda olub. Baş məşqçi və klub rəhbərliyi bunu rəqabətin güclü olmasıyla əlaqələndirsə də, başqa səbəblərin olmasıyla bağlı da şübhələrim var. Yoxsa futbolçu nədən iki ayağını bir başmağa dirəyib getməkdə israr etsin ki?! Müstəntiqlik edib qaranlıq məqamları aydınlaşdırma kimi məqsədim yoxdu. Zatən buna ehtiyac da qalmayıb. Futbolçunun qiyamı effekt verdi və müqaviləsi qarşılıqlı razılıq əsasında pozuldu. Nəticədə Ceyhun azad agent statusu qazanmaqla “Zirə”nin sıralarına qoşuldu. Bununla həm Rəşad Sadıqov, həm də Ceyhun Nuriyev arzusuna çatdı. Belə ki, biri komandasının hücum xəttini gücləndirmək, digəri daha çox oynayıb şans qazanmaq istəyirdi. Şübhə yox ki, yığmamızın sabiq kapitanı “Sabah”da yetərincə şans qazana bilməyən futbolçunu transfer edibsə, deməli, onun potensialına bələddi. Zatən hazırda “qartallar”ın hücum xəttində ciddi böhran var. Sadıqov heyətdə yer alan iki hücumçudan istədiyi kimi yararlana bilmir. Felipe Paxtman gələndən “zədələr zəncirinin içindədi”. “Sambaçı” nə vaxt meydana çıxırsa, bir qədər sonra zədəli kimi vaxtsız oyunu tərk edir və bu da müntəzəm hal alıb. Vladislav Kulaç ötən mövsüm qəsəbə təmsilçisinə böyük ümidlərlə cəlb olunsa da, cari mövsümdə zədəyə görə kənarda qaldı. Ukraynalı artıq zədəsini sağaltsa da, istənilən formada deyil. Məhz buna görə baş məşqçi məcburiyyətdən Rüstəm Əhmədzadəni, Rəhim Sadıxovu, bəzən də İsa Cibrilanı forvard kimi oynadır. Təbii ki, bu alternativlər arzulanan effekti vermir. Ceyhunun transferiylə “Zirə” də vingerlərin sayı bir qədər də artdı. Sual doğur: Rəşad Sadıqov “Sabah”ın sabiq oyunçusunu hansı mövqedə sınayacaq? Hesab edirəm ki, baş məşqçi bu variantlara əl atacaq.
1. Kulaçla Paxtman lazımi formanı bərpa edənə kimi Rüstəmə hücumun sivri ucunda şans verməklə Ceyhunu “11 nömrə”nin mövqeyində yoxlamaq;
2. Rəhimi yenidən hücumçu kimi sınayıb Ceyhunla Rüstəmin məharətindən vinger kimi yararlanmaq, sürətli keçidlər təşkil etmək;
3. Ceyhundan forvard kimi yararlanmaq
Sonuncu variantın daha real olduğunu düşünürəm. Çünki Ceyhunun yaşıını, gücünü, fiziki göstəricilərini, qol duyumunu və futbol aclığını nəzərə alsaq, özünü doğrultmaq üçün bütün qüvvəsini ortaya qoyacaq. Futbolçu həm Rəşad Sadıqovun ehtimadını doğrultmaq, həm də “Sabah”da haqsızlığa düçar olduğunu göstərmək üçün meydanda dəridən-qabıqdan çıxacaq. İndi qalır qış toplanışında yeni komandasının ansamblına uyğunlaşmaq və çempionatın 2-ci yarısından özünü göstərmək.

ABDULLA İSMAYILOĞLU