Rəşad Sadıqov "Sumqayıt"la oyundan sonra keçirilən mətbuat konfransında "2-3 hücumameyilli futbolçu transfer etmək istəyirdik, amma alınmadı, ümidimizi itirmirik, axtarışlarımızı davam etdirəcəyik" deməklə hələ də hücumda zəif olduqlarını etiraf etdi.

"Zirə" mövsümə yaxşı başlayaraq hələlik vahid lider olsa da, komandanın hücum xətti arzulanan səviyyədə deyil. "Qartallar"ın heyətində 3 forvard, 2 vinger yer alır. Hücumçulardan Felipe Paxtmanna Rəşad Sadıqovun hədsiz ümid bəsləsə də, onun özünü doğrultmasına zədələr imkan vermir. Braziliyalı ötən mövsüm iki dəfə zədələnərək çempionatdan kənarda qaldı. Vladislav Kulaç ötən “futbol ili”nin 2-ci yarısından qəsəbə təmsilçisinə keçərək özünü yaxşı tərəfdən göstərib qollar vursa da, klubda yetərincə rəqabətin olmaması onun sabit formada qalmasına imkan vermir. Toni Qomes də böyük ümidlərlə transfer olunmuşdu. Ancaq sürətdən başqa heç nəyi ilə seçilmədi. Nəticədə mövsümün əvvəlində "Zirə" donanmasını tərk etdi. Rəşad Sadıqov məcburiyyətdən Rəhim Sadıxovu hücum xəttində oynatsa da, effekt vermədi. "Qarabağ"dan icarəyə götürülən Rüstəm Əhmədzadə də çalışqanlığını faydalı iş əmsalına çevirə bilmir. Hamidu Keytanın "Qarabağ"a keçidi “vuran ayaq” böhranını daha da dərinləşdirdi. Salif Sumanın yayda komandaya qoşulması da qəsəbə təmsilçisinin gücünə güc qatmadı. Cari mövsümdə 6 turdan sonra 15 xalla turnir cədvəlinə başçılıq edən "Zirə"nin vurduğu 6 qola nəzər yetirsək, yarısının müəllifi müdafiəçilərdi. Hələ çempionat marafonunun uzun olduğunu, cəza, zədə, xəstəlik kimi halları nəzərə alsaq, "qartallar"ın qol vuran oyunçularla bağlı böhran yaşaması qaçılmazdı. Bəs yeni oyunçular tapmaq üçün variant varmı?

"Qarabağ"a böyük ümidlərlə transfer olunan və bir neçə gün öncə 4 aylıq maaş kompensasiyası ödənilməklə yola salınan Qaspar Panadero "Zirə"yə keçə, Ağdam təmsilçisində rəqabətə uduzsa da, Rəşad Sadıqovun komandasını gücləndirə bilər. Unutmayaq ki, bu vaxta kimi Hacıağa Hacılı, Rüstəm Əhmədzadə, yayda isə İsmayıl İbrahimli daha çox oynamaq üçün "qartallar"ın sırasına qoşulub. Yəni Panadero Rəşad Sadıqovun sərəncamına keçsə, pis olmaz. Düşünürəm ki, futbolçu özünü doğrultmaq üçün "Zirə"də performansını yüksəldə bilər.

Belaruslu Yeqor Boqomolski də "Neftçi"də möhkəmlənə bilmir. Onun ulduzu heç cür parlamır. Belarus yığmasının üzvü son 6 turun üçündə şans qazanmaqla cəmi 69 dəqiqə meydanda olub. Boqomolski qəsəbə təmsilçisinə keçməklə həm daha çox şans qazanar, həm də klubda rəqabəti gücləndirə bilər. "Sabah"ın yetirməsi, Camal Cəfərov da özünü yaxşı tərəfdən göstərmək üçün "bayquşlar"dan "qartallar"a keçid etsə, uduşlu ola bilər. U-21 yığmamızın üzvü onsuz da "Sabah"da şans qazana bimir və daha çox əvəzedici heyətdə çıxış edir. Rəşad Sadıqov gənc oyunçuların potensialından yararlanmağı bacaran mütəxəssisdi. Hacıağa Hacılı, Cəlal Hüseynov və başqalarını gösərmək olar. Odu ki, 21 yaşlı Camal da "Zirə"də təcrübə toplamaqla gələcək karyerasında yüksəlişə qədəm qoya bilər. Xülasə "Zirə" ölkə xaricində yeni nəfəa axtarmaq əvəzinə qeyd etdiyim oyunçular üzərində fokuslansa, yaxşı olar.

ABDULLA İSMAYILOĞLU