Səudiyyə Ərəbistanında yaşanan biabırçılıqdan sonra ortaya təbii olaraq sual çıxır ki, Türkiyə superkuboku uğrunda oyun nə vaxt baş tutacaq?

Xatırladaq ki, dekabrın 29-da Səudiyyə Ərəbistanının paytaxtı Ər-Riyadda keçirilməli olan ''Qalatasaray'' - ''Fənərbaxça'' derbisi ərəblərin Atatürklə bağlı qadağaları üzündən baş tutmadı. Klublara meydana Atatürkə aid köynəklər və pankartla çıxmaq qadağan edildi.

Artıq ''Beşiktaş'', ''Samsunspor'', ''Ankaragücü'' kimi klublar öz stadionlarının qapılarını superkuboka açıblar. Onlar bu matçı təşkil etməyə hazır olduqlarını bildiriblər. Derbinin yeni tarixi hələ rəsmən müəyyənləşməsə də, indidən bəzi mülahizələr yürütmək olar. Çünki ikinci dövrə üçün təqvimdə elə də çox boş yer yoxdu.

Yeni ilin başlaması ilə birlikdə klubların belə desək, başını qaşımağa da vaxtı olmayacaq. Bu müddətdə superkubok üçün əsas boşluq yanvarın sonu, fevralın əvvəli yaranacaq. Fevralın ortalarından etibarən həm Türkiyə kubokunda, həm də avrokuboklarda oyunlar başlayacaq. Mart da çox sıx keçəcək. Üstəlik martın sonlarında yığma oyunları da olacaq. Apreldə də müəyyən boşluq tapmaq mümkün olacaq. Amma bunun üçün həm ''Fənər'', həm də ''Cim-Bom'' avrokuboklarda mübarizəni dayandırmalıdı.

Qısası superkubok böyük ehtimalla ya yanvarın sonlarında, ya da apreldə oynanılacaq.

ƏLİ