"Öncəliklə vurğulayım ki, peşəkar liqada ilk dəfə çıxış edirik. Bu bizim üçün əlamətdar hadisədi. Ona görə də təşkilatı işlərdə maksimum daha az nöqsan etməyə çalışdıq. Stadionumuzda təmir, yenidənqurma işləri həyata keçirdik. Çıxışımıza gəlincə, debütant kimi qarşımıza böyük iddialar qoymamışdıq. Çempionat ərəfəsində baş məşqçi dəyişikliyi gerçəkləşdirdik. Hazırda Rüfət Quliyevin məşqçi işini görməkdəyik. Nəticələrimiz, təbii ki, ürəkaçan deyil. 1-ci dövrəni sonuncu pillədə tamamlamaq istəməzdik. Söz yox, çatışmazlıqlarımız var. Amma elə oyunlar oldu ki, hakimlərin səhv qərarlarının qurbanı olduq. Buna rəğmən, sevinirik ki, komandamız meydanda sona qədər döyüşür, diş göstərir. Son oyunlarda da bunu görə bilərsiz. Sadəcə, bəxtsizlikdən, təcrübəsizlikdən dolayı xal və xallar götürə bilmədik. 13 turda cəmi bir qələbə qazandıq. Amma təslim olmaq fikirimiz yoxdu. Qış fasiləsindən maksimum yararlanıb 2-ci yarıya yaxşı hazırlaşmaq istəyirik. “Gözaltı etdiyimiz”, danışıq apardığımız, hətta müqavilə bağladığımız futbolçular var. Bayramdan sonra bu barədə açıqlama veriləcək".