"4 turdan sonra komandamızın mövcud vəziyyətiylə bağlı futbolçularla xeyli söhbət etmişdim. Hər məşqdə onlara özünəinam və qələbə qazanmağın vacibliyini aşılayırdıq. Oyuna istədiyimiz kimi başlaya bilmədik. Həm texniki, həm də mövqe səhvi nəticəsində qapımızda qol gördük. Rəqib ilk hissəni üstün keçirdi. Fasiləyə məğlub yollandıq. Lakin paltardəyişmə otağında futbolçularla bir daha söhbətimiz oldu. Onlara hələ heç nəyin bitmədiyini, qarşıda bir hissənin olduğunu və hər şeyin özümüzdən asılı olduğunu bildirdim. Uşaqlar fasilədən sonra meydanda xarakter göstərməklə döyüşdülər. Nəticədə hesabda geridə olduğumuz matçda geridönüş edərək 5:2 hesablı qələbə qazandıq. Bu münasibətlə futbolçularımı, azarkeşlərimizi səmimi qəlbdən təbrik edirəm. İnşallah, bu qələbə bizim üçün uğurlu yolun başlanğıcı olar. Yeni transferlərimiz də özlərini yaxşı tərəfdən göstərdilər. Onların ilk oyunları olsa da, meydanda istəkliydilər. Təbii ki, hələ özlərini yaxşı tərəfdən göstərmək üçün şansları və vaxtları olacaq. Bununla yanaşı, çatışmazlıqlarımız da çoxdu. Ona görə də qısa zaman çərçivəsində nöqsanları aradan qaldırmalıyıq. Hazırda əsas problem vaxtın az olmasıdı. Heyətimizə daha bir əcnəbi futbolçu cəlb edəcəyik. Danışıqlar yekunlaşmaq üzrədi. Əslində əsas məqsədimiz yerli oyunçuları cəlb etməkdi. Amma bütün futbolçuların klublarla müqavilələri olduğundan buna nail ola bilmirik".

"Məşqçimizi dəyişdik. Rüfət müəllim komanda daxilində ab-havanı dəyişdi. Heyətə də əl gəzdirdik. Yeni futbolçular, əsas da üç legioner cəlb etdik. Onlar da qələbədə əsas pay sahibilərindən idi. Bütövlükdə komandamız mübariz oyunla əzmkar qələbə qazandı. Başda Rüfət müəllim olmaqla hamılıqla "Araz Saatlı"nı inkişaf etdirməkdə maraqlıyıq. Bu oyunu yaddan çıxarıb, ağır Zaqatala səfərini düşünməliyik".