Futbol üzrə ölkə çempionatının 1-ci liqa klubları keçirilən 12-ci tur oyunundan sonra qış fasiləsinə yollandı.

Hələ ki, uğursuz nəticələrinə görə gözə batan iki klubdan biri “Difai Ağsu”du. Kollektiv 4 xalla turnir cədvəlinin 9-cu pilləsində qərarlaşıb. Lakin, xoşagəlməz mənzərə rəhbərliyi narahat edir ki, artıq islahatlara start verilib.

Bilindiyi kimi, Ağsu təmsilçisinin baş məşqçisi Paşa Əliyev olsa da, komandanı oyunlara mütəxəssisin əvəzedicisi Elgiz Kərəmli çıxarırdı.

“Football-plus.az”ın əldə etdiyi məlumata görə, dünən reallaşan klubdaxili iclasda məhz bu yöndə qərarlar qəbul edilib. Paşa Əliyev “Difai Ağsu”nun idman direktoru, Elgiz Kərəmli isə baş məşqçisi təyin edilib. Maraq üçün qeyd edək ki, adıçəkilən şəxslər onsuz da həmin vəzifələri icra edirdi. Sadəcə, məsələ artıq kağız üzərində öz təsdiqini tapıb və yanvarın 1-dən etibarən qüvvəyə minəcək.

Məlumatı saytımıza klubun prezidenti Asəf Məlikov təsdiqlədi.

KƏNAN BAHADIR