“Transfer işlərinə indidən başlamışıq” – Elgiz Kərəmli
Dünən 1-ci liqada 7-ci turun açılış matçında “Şamaxı” “Difai Ağsu”nu qəbul etdi. Meydan sahiblərinin aşkar üstünlüyü ilə keçən oyun 2:0 hesabı ilə bitdi.
Oyundan sonra Ağsu təmsilçisinin yeni çalışdırıcısı Elgiz Kərəmlinin fikirlərini öyrəndik:
“Ağır oyun olacağını bilirdik. “Şamaxı” ötən mövsüm premyer-liqada çıxış edirdi, komandanın təcrübəsi yüksəkdi. Məşqçilər heyəti də çox savadlı şəxslərdən ibarətdi. Güclü heyətləri var. Onlara qarşı oynamaq həqiqətən çətindi. Bunu nəzərə alıb oyunumuzu müdafiədən qurmağa çalışdıq. Qalib gələ bilməsək də, futbolçularımız sona qədər mübarizə apardılar”.
Kərəmli komandanı son pillədən xilas etmək üçün əlindən gələni edəcəyini də bildirdi. O, transfer işləri ilə bağlı suallarımızı cavabladı:
“İnşallah, daha yaxşı olacağıq. Dekabrın 25-dək matçlarımız var. Ondan sonra “axsayan” mövqelərə oyunçu gətirəcəyik. Transfer işlərinə indidən başlamışıq. Çalışacağıq ki, komandanı gücləndirək. Son pillədən qurtulmaq, daha yaxşı yerlər uğrunda mübarizə aparmaq üçün əlimizdən gələni edəcəyik”.
İSMAYIL XEYRULLAYEV, Şamaxı
Digər xəbərlər
