"İlk növbədə onu deyim ki, Paşa müəllimlə aramızda heç bir şəxsi problem yoxdu. Onunla Region Liqasında birgə olduq, komandanın formalaşmasında da xidmətlərini danmırıq. Amma 1-ci liqada hazırdakı nəticələr ürəkaçan deyil. Ona görə də baş məşqçi dəyişikliyinə getdik. Paşa Əliyev nə istefa verib, nə də istefaya göndərilib. Sadəcə, komandadan uzaqlaşdırmışıq. İstefa məsələsi gündəmdə deyil. Hazırda baş məşqçi funksiyasını Elgiz Kərəmli icra edir. Gənc, savadlı, kreativ düşüncəli məşqçidi. Məşq prosesinə, futbolçularla ünsiyyətdə yeni yanaşması olan biridi. O, hələlik bizi qane edir. Paşa müəllimə gəlincə, onun klub üçün xidmətlərini danmırıq. Onun təcrübəsinə, bacarığına ehtiyac duyulsa və özünü doğrulda biləcək vəzifə olacaqsa, xidmətindən yararlanacağıq".

"Mütləq şəkildə transferlər həyata keçirməliyik. Amma bu məsələdə əsas söz sahibi baş məşqçidi. Elgiz müəllim hansı mövqelərə oyunçu istəsə, əlimdən gələni edəcəm. Klub başçısı olaraq onu deyə bilərəm ki, legioner gətirməyəcəyik - büdcəmizə və məqsədlərimizə uyğun deyil. Ümumiyyətlə, biz böyük vədlərlə danışmağı sevmirik. Necə deyərlər ayağımızı yorğanımıza görə uzadırıq. Ona görə də yerli və azad agent statusuna malik futbolçuların transferində maraqlıyıq. Təbii ki, imkan olsa, elita təmsilçilərinin əvəzedicilərindən də oyunçu cəlb etmək istəyərik. Sadəcə, hazırda bütün çempionatlar davam etdiyindən öz çapımıza uyğun futbolçu axtarışında çətinlik çəkirik. Amma inanıram ki, axtardığımız oyunçuları tapacağıq".