Dekabrın 21-də Xankəndidə çoxdan gözlənilən ölkə kubokunun "Qarabağ" - MOİK oyunu keçirildi. Əlbəttə, bu adi bir futbol matçı deyildi, həm də böyük qayıdışın bir hissəsiydi.

Təbii ki, oyunun Qarabağın mərkəzi şəhərində keçirilməsində əsas pay sahibləri PFL rəhbərıiyidi. Təəssüf ki, adı çəkilən qurumun idarəçiləri dekabrın 16-da ağır avtomobil qəzası keçirdiklərindən bu oyunda iştirak edə bilmədilər. Bəs həmin simalar Xankəndidə keçirilən oyundan razı qaldılarmı? İşğaldan azad olunmuş bölgədə futbol bayramı alındımı? Gələn il də bu stadionda "Qarabağ"ın kubok və premyer-liqa matçlarının təşkili nəzərdə tutulurmu? Ümumiyyətlə, 1-ci və 2-ci liqa təmsilçiləri ölkə kubokuna rəng qatdımı? Aşağı liqa komandalarının gələcəkdə daha yaxşı təşkilatlanmış və ürəkaçan infrastruktura malik şəkildə ölkə kubokuna qatılması gözlənilirmi? Bütün bu suallara cavab tapmaq üçün PFL-in texniki-idman direktoru Elgiz Abbasova müraciət etdik.

Xankəndi haqda
- Peşəkar Futbol Liqası olaraq, böyük futbolun Xankəndi şəhərinə qayıtmasına çox sevinirik. Əlbəttə, bu, təkcə futbol hadisəsi deyil, eyni zamanda, ölkəmiz üçün çox böyük əhəmiyyətə malik olaydı. Ali Baş Komandan, cənab Prezident İlham Əliyevin rəhbərliyi altında ordumuzun göstərdiyi şücaət nəticəsində ərazi bütövlüyümüzün bərpa olunmasından sonra xalqımız Xankəndidə həqiqətən də böyük futbol bayramına şahidlik etdi. Biz həmin gün xalqın, prezidentin, şəhid övladlarının, futbol klublarının birliyinin bir daha şahidi olduq. PFL olaraq, bu işdə zərrə qədər də əməyimiz, əziyyətimiz varsa, bu, bizim üçün böyük şərəfdi. Bundan sonra da Xankəndi şəhər stadionunda oyunların təşkili nəzərdə tutularsa, təşkilatçı qurum kimi bu işi görməyə canla-başla hazırıq.

Aşağı dəstə klubları haqda
- Bilirsiz ki, 2-ci liqa yenicə yaradılmış çempionatdı. Bu il həm 2-ci liqa komandaları, həm də 1-ci liqanın tam tərkibi üçün kubokda iştirak ilk idi. Buna qədər 1-ci liqa klublarının kubokda iştirakı məcburi deyildi. Amma bu mövsüm həm onların, həm də yeni yaradılmış 2-ci liqanın bütün kollektivlərinin kubokda oynamasını təmin etdik. Əlbəttə, biz problemləri bilə-bilə bu işə başladıq. Çünki problemlərin üzərinə getməsən, onların həlli mümkün deyil. İnfrastruktur problemləri olduğuna görə kubokun müəyyən mərhələlərində stadion rotasiyaları etdik. Bəzi klublar nominal ev sahibi olsa da, səfərdə oynadı. Bunu Əsasnamənin tələbinə uyğunlaşdırdıq. Əlbəttə, biz də istərdik ki, bütün stadionların infrastrukturu oyunları qəbul etməyə hazır olsun. Amma belə imkan olmadığı təqdirqə vəziyyətə uyğun qərarlar qəbul etməliyik. Ümumi götürdükdə bu kubok yarışı başqalarından ciddi mənada fərqləndi. Belə ki, PFL bayrağı altında keçirilən kubok yarışlarında iştirakçı sayında rekord qeydə alındı. Peşəkar futbol həyəcanı bütün komandalar tərəfindən hiss olundu və sevindirici haldı ki, klublardan aldığımız rəylər müsbətdi. İnşallah, növbəti illərdə də biz eyni qaydaları tətbiq edərək Azərbaycan kubokunda daha çox komandanın iştirakını təmin etməyi düşünürük.

ABDULLA İSMAYILOĞLU