Türkiyə çempionatının cari mövsümündə 12 turdan sonra 5 xalla sonuncu pillədə qərarlaşan “İstanbulspor”da şok olay yaşanıb.

"Football-plus.az" xəbər verir ki, komandanın liderlərindən və ən təcrübəli isimlərindən biri olan İbrahim Yılmaz müqaviləsini birtərəfli qaydada ləğv edərək İstanbul təmsilçisindən ayrılıb.

Türkiyə Futbol Federasiyasındakı rəsmi mənbədə futbolçunun 2023-cü ilin noyabrın 23-də müqaviləsini ləğv etdiyi qeyd olunub. Oyunçunun bu addımının səbəbi məlum olub. Türkiyə mətbuatının yazdığına inansaq, Yılmaz bir müddət öncə - oktyabrın sonlarında klub prezidenti Ecmel Faik Saralıoğlu ilə görüş keçirib. Həmin görüşdə ikili arasında ciddi münaqişə yaşanıb. Hətta başqan əlinin altındakı bir cismi futbolçunun üstünə fırladıb! Yaralanan və bununla bağlı həkimdən xüsusi kağız alan İbrahim Yılmaz o vaxtdan bəri heç bir oyuna çıxmayıb və srağagün “İstanbulspor”la əlaqələrini birdəfəlik kəsib.

Daha bir iddiaya görə hadisə baş verən an otaqda “İstanbulspor”un digər üzvü Mehmet Yeşil də olub. Bu futbolçu həmin həftəsonu oynanılan “Ankaragücü”yə qarşı matçda qeyri-müəyyən səbəbdən ehtiyatda qalıb. Bu görüş Yeşilin bu mövsüm ehtiyatda qaldığı yeganə oyundu. Qeyd edək ki, 2016-dan bəri “İstanbulspor”un şərəfini qoruyan 29 yaşlı İbrahim Yılmaz “İstanbul BŞ”nin yetirməsidi. O, daha öncə “Darıca Gənclərbirliyi”, “Altınordu” və “Şanlıurfaspor”da top qovub. Ötən mövsümün 2-ci dövrəsini isə 1-ci liqa təmsilçisi “Eyupspor”da keçirib. 2021/22-də “İstanbulspor”un superliqaya vəsiqə qazanmasında böyük rolu olan İbrahim Yılmaz indiyə qədər bu klubda 214 rəsmi oyunda 55 qol, 25 məhsuldar ötürməlik performans sərgiləmişdi.

Bu mövsüm isə onun hesabında superliqada 8 oyunda 2 qol var idi.