Startı dekabrın 5-6-da iki oyunla verilən İtaliya kubokunun 1/8 finalında bu həftə keçirilən matçların nəticəsi çox gözlənilməz oldu.

“Football-plus.az” xəbər verir ki, çərşənbə axşamı ölkə çempionu “Napoli”nin evdə “Frozinone”yə 0:4 (!) hesablı məğlubiyyətindən sonra “İnter” də öz meydanında uduzaraq mübarizəni erkən dayandırdı.
Mərhələnin sayca 4-cü oyununun favoriti sayılan “İnter” son iki mövsümdə kuboku muzeyinə aparmışdı. Milanlıların evdə “Bolonya”ya qalib gəlmək şansı yüksək idi. Hərçənd qonaq komanda A seriyasının cari mövsümündə bu rəqibə səfərdə uduzmamışdı: oktyabrın 7-də Milanda keçirilən matçın ilk 13 dəqiqəsində Açerbi ilə Lautaro Martinesin vurduğu qollar ev sahiblərinin erkən üstünlüyünü təmin etsə də, qalan vaxtda Orsolini ilə Zirkzee bolonyalılara xal qazandırmışdı. Onda çoxları Tyaqo Mottanın komandasının cari mövsümün əsas kəşfi olacağını düşünə bilməzdilər. Lakin sabit oyunu ilə seçilən “Bolonya” ölkə çempionatının 16-cı turundan sonra 4-cü yerə yüksəlməklə, necə deyərlər, az aşın duzu olmadığını bir daha göstərmişdi.

Milanlıların meydana qeyri-optimal heyətlə çıxacağı gözlənilirdi. Belə seçim Simone İnzaqinin komandasının oyun planında üstünlük qazanmasına mane olmadı. Lakin meydan sahiblərinin rəqib qapısına yol tapmasına böyük ölçüdə Ravalya imkan vermirdi. “Bolonya”nın ehtiyat qapıçısı 65-ci dəqiqədə əllə oyuna görə təyin olunan penaltinin qolla nəticələnməsinə də mane oldu. Martinesin zərbəsinə əla reaksiya verən Ravalya və oyundaşları, hər necə olsa, mübarizəni əlavə vaxta daşımağı bacardılar.

30 dəqiqəlik “overtaym” yenicə başlamışdı ki, Auqusto künc zərbəsindən göndərilən topa başla toxunaraq milanlıları önə keçirdi. Bundan sonra Mottanın komandası müdafiəni çox da düşünə bilməzdi. Qonaqlar da künc zərbəsindən sonra hesaba tarazlıq gətirdilər. Bundan sonra daha böyük qüvvə ilə irəli atılan neydan sahibləri əks-hücumda yaxalandılar. Qapıçı Audero ilə təkbətək qaldığı epizodda qələbə qolunu vuran Ndoye “İnter”in titulu əldən verməsini rəsmiləşdirdi.

Beləliklə, “Bolonya” sensasiyalı şəkildə 1/4 finala çıxdı. Mottanın komandası bu mərhələdə evdə “Fiorentina” ilə qarşılaşacaq.

1/8 final
İnter – Bolonya 1:2, əlavə vaxtda
Auqusto, 92 – Beukema, 112. Ndoye, 116.
İnter: Audero, Darmian, Açerbi, A.Bastoni (Dimarko, 74), Bissek (Pavar, 90), Auqusto, Klassen (Barella, 74), Frattezi, Asllani (Sensi, 83), Lautaro Martines (Mxitaryan, 99), Arnautoviç (Türam, 74).
Bolonya: Ravalya, Koratsa (De Silvestri, 76), Lukumi (Kalafyori, 99), Beukema, Likoyannis, Moro (Əl-Azzuzi, 69), Ebişer, Urbanski, Fabbian, Salemakers (Ndoye, 85), Van Hooydonk (Zirkzee, 85).

Bu mərhələnin digər oyunlarının nəticələri: Latsio – Cenoa 1:0 (Genduzi, 5), Fiorentina – Parma (D-2) 2:2, p. – 4:1 (Nzola, 83. Sottil, 89 – Bernabe, 21. Bonni, 23), Napoli – Frozinone 0:4
(Barreneçea, 65. Kazo, 75. Çeddira, 90+1-p. Harrui, 90+5).
“Milan” – “Kalyari”, “Atalanta” – “Sassuolo”, “Roma” – “Kremoneze” (D-2), “Yuventus” – “Salernitana” oyunları gələn il yanvarın 2-4-ü aralığında keçiriləcək.

Oyundan sonra
Filippo İnzaqi, “İnter”in baş məşqçisi: “Məyusuq, axı son iki ildə ölkə kubokunu qazanmışdıq və bu gün də qələbəyə layiq idik. Amma bu futboldu. Oyun planında yalnız əlavə vaxtın son 15 dəqiqəsində problemimiz oldu. Hesabdakı üstünlüyü əldən verməyə alışmamışıq. Komandamız 90 dəqiqədən artıq müddətdə yaxşı oyun sərgiləsə də, sonda məğlub olduq. Uşaqlar da azarkeşlərimiz kimi 1/4 finala vəsiqəni arzulayırdılar, amma istəyimiz baş tutmadı. Martinesin zədəsinin nə dərəcədə ciddi olduğuna geniş müayinədən sonra aydınlıq gələcək. Həkimlər korpusu ona görə sakitdi. Ciddi bir şey olmadığına ümid edirik. İki gün yarımdan sonra növbəti oyuna çıxacağıq”.