Azər Bağırov “Araz-Naxçıvan”ın ilk məğlubiyyətinin səbəbini açıqladı
Birinci divizionun iddialı komandalarından “Araz-Naxçıvan” cari mövsümdə yalnız iki matçda - 8-ci turda “Qəbələ-2”, 10-cu turda isə MOİK-lə heç-heçə edərək xal itirmişdi.
11-ci turda isə ilk məğlubiyyətini yaşadı. Komanda səfərdə “Mingəçevir”ə 0:1 hesabı ilə uduzdu.
Maraqlıdı, inamla irəliləyən “Araz-Naxçıvan”ın yenilməsinin səbəbi nədi? Bu nəticə qarşıdakı oyunlara necə təsir edəcək? Komandanın baş məşqçisi Azər Bağırov “Football-plus.az” saytına bunları söylədi:
“Mingəçevir”lə oyunda çox qol epizodu yaratdıq. Sadəcə, yararlana bilmədik. Rəqibin bir hücumu oldu, onu da özümüz yaratdıq və kiçik səhvə görə qapımızda qol gördük. Ondan sonra isə nə qədər toparlanmağa, oyunu yenidən qurmağa çalışsaq da, alınmadı. Buna müəyyən qədər meydan amili də təsir etdi. Amma futbolda belə hallar olur. Gördüyümüzü gördük. İrəli baxmaq lazımdı. Təbii ki, heç bir məğlubiyyət təsirsiz ötüşmür. Lakin düşünürəm ki, bu komandaya qarşıdakı oyunlar üçün daha çox motivasiya verəcək”.
ŞAİR ABDULLA
