İspaniya futbolunda təqdirəlayiq yenilik olacaq. Yerli futbol federasiyası və La Liqanın rəhbərliyi hakimlərin işi ilə bağlı şərikli qərar qəbul edib.

"Football-plus.az" xəbər verir ki, ölkənin yüksək divizionu olan La Liqanın saytının məlumatına görə, artıq çempionat oyunlarından sonra meydanda fəaliyyət göstərən hakimlərlə onların VAR otağında olan həmkarları arasında gedən söhbətlərin video- və audio yazıları ictimaiyyətə çatdırılacaq. Yazılar hər oyun gününün sonunda geniş kütləyə təqdim olunacaq. Bu təcrübə ilk dəfə gələn il yanvarın 14-də keçiriləcək 20-ci turun oyunları zamanı tətbiq ediləcək. Rəsmi məlumatda belə tədbirlərin tətbiqinin hakimlərin işini və yarışı daha şəffaf edəcəyi vurğulanıb. Nəticədə azarkeşlər hakimlərin matç zamanı nə üçün bu və ya digər qərarı qəbul etdiyini daha yaxşı anlayacaqlar.

Xatırladaq ki, bu yenilik daha əvvəl İtaliya çempionatının yüksək liqası olan A seriyasında tətbiq edilib.