İtaliya Futbol Federasiyası, İtaliya Hakimlər Assosiasiyası və DAZN şirkəti yerli futbolun inkişafı ilə bağlı müştərək layihəni razılaşdırıb.

“Football-plus.az” xəbər verir ki, layihə hakimliklə bağlıdı. Bu problemə həsr olunan “Open VAR” verilişinin ilk buraxılışı sentyabrın 24-də efirə gedib.

A və B seriyası hakimlərinin meneceri, məşhur hakim Canluka Rokki həmin verilişdə İtaliya çempionatının sentyabrın 16-18-i aralığında keçirilən oyunlarındakı mübahisəli epizodları şərh edib. Tamaşaçılara hakimlərin və onların videoyardımçılarının işi detallı şəkildə göstərilib, onların danışıqlarına qulaq asmaq imkanı yaradılıb, Rokki isə bütün bunları şərh edib və qiymətləndirib.

İtaliya hakim korpusunun rəhbərliyi bu verilişi tarixi məqam adlandırır və ümid edir ki, idarəçiliklə bağlı problemlər azarkeşlər üçün daha anlaşıqlı, oyunların gedişində qərarların verilməsi prosesi isə daha şəffaf olacaq.

“Open VAR” müntəzəm şəkildə efirə çıxacaq.