Dünən Rusiya Futbol İttifaqının (RFİ) İcraiyyə Komitəsinin iclası keçirilib.

"Football-plus.az" xəbər verir ki, iclasda əsas müzakirə mövzusu Rusiyanın Avropa zonasından Asiya zonasına keçirilməsi olub. Amma komitə üzvləri yekdil səslə Rusiyanın UEFA-nın tərkibində qalmasına qərar veriblər

İndiki məqamda başqa qitəyə keçməyin heç bir ciddi faydası yoxdu. Çünki FİFA hətta bu baş verəcəyi halda da Rusiyanın Asiya zonasındakı beynəlxalq turnirlərə buraxılacağına zəmanət vermir! Ona görə də RFİ UEFA-da və Avropa zonasında qalmaqda, eləcə də beynəlxalq turnirlərə qayıtmağın yollarını tapmağa çalışmaqda davam edəcək.

RFİ-nin prezidenti Aleksandr Dyukov bildirib ki, FİFA və UEFA onları böyük məmnuniyyətlə yarışlara qaytarmağa hazırdı. Amma bu məsələdə heç də hər şey bu qurumlardan asılı deyil. Xatırladaq ki, Rusiyanın Ukraynaya hərbi təcavüzü üzündən artıq iki ilə yaxındı ki, Rusiya klubları və bu ölkənin yığma komandası beynəlxalq turnirlərdən kənarlaşdırılıb.

Bu yaxınlarda UEFA və FİFA Rusiyanın U-17 yığmasını belə desək, geri qaytarmağa cəhd etsə də, bu addım digər ölkə federasiyalarının boykot təhdidi ilə müşayiət olundu.

Yeri gəlmişkən, onu da bildirək ki, Dyukovun sözlərinə görə, Rusiya yığması 2024-cü ildə Serbiya ilə yoldaşlıq oyunu keçirəcək. Görüş Rusiyanın ərazisində baş tutacaq.