"Azərbaycan futbolu və "Qarabağ" adına önəmli qarşılaşmada hakim idarəçiliyi baxımdan obyektivliyə böyük ehtiyac duyulurdu. Görüş ağdamlılar üçün çox uğurlu başladı və fitdən dərhal sonra hesab açıldı. Meydanda ağdamlıların böyük ərazi üstünlüyünə malik olması, komandaların, futbolçuların bir-birinə hörmətlə yanaşması refetinin işini nisbətən asanlaşdırırdı. Baş hakim oyunçularla vizual və faktiki ünsiyyət, dialoq  qurmağı bacarır, ədalətli qərarlarla futbolçuların rəğbətini qazanırdı. Referi ikili mübarizələrin sona kimi davam etməsinə şərait yaradır, “üstünlük” prinsipindən tez-tez yararlanırdı. Bu amil oyunun dinamikasını, tempini  qoruyur, sürətin aşağı düşməsinə imkan vermirdi.

Albaniyalı referi rəsmi xəbərdarlığı, vərəqələrdən istifadəni son anda həyata keçirirdi. Fasilədən sonra "Qarabağ" şanssız epizod yaşadı, Veşoviç mübarizə anında ehtiyatsız hərəkət edərək meydandan qovuldu. Onun qovulması obyektiv qərar idi. Azlıqda qalan komandamız 40 dəqiqə çətin anlar yaşadı, isveçlilər oyunda təşəbbüsü ələ alaraq təzyiqi, hücumları artırdı. Bu dəqiqələrdə baş hakimdən daha diqqətli, həssas idarəçilik tələb olunurdu. Referi gərgin keçən 2-ci hissədə bunun öhdəsindən layiqincə gəldi və final fiti ilə Azərbaycan futbolunda yeni tarixinin yazılmasını rəsmiləşdirdi”.