"Qarabağ" - "Molde" qarşılaşması prinsipial xarakter daşısa da, son dəqiqələrdə futbolçular arasında kiçik mübahisəni çıxmaqla, komandalar bir-birinə nümunəvi münasibət göstərirdi. İkili mübarizələr qaydalar çərçivəsində aparılır, oyunçular meydanda peşəkar davranırdı. Oyunun bu tərzdə keçməsində hakimlər briqadasının böyük əməyi oldu. Şotland referi ilk dəqiqələrdən ədalətli qərarları ilə futbolçuları özünə inandıraraq qayda pozuntularını dəqiqliklə sezirdi. Baş hakim  oyunçularla mükəmməl dialoq qururdu. Obyektiv qərarlar futbolçularda referiyə şəksiz inam yaradır, hər saxlanılan epizodun doğru olduğu qəbul edilirdi. Son dəqiqələrdə qapıçı Lunyova qarşı qayda pozuntusunu çıxmaq şərti ilə, baş hakim oyunu mükəmmələ yaxın səviyyədə idarə etdi. Hər iki tərəfə münasibətdə eyni olan ədalətli hakimliyə çox az oyunlarda rast gəlinir. “Üstünlük” prinsipindən yerində istifadə edən şotland referi sarı vərəqələrdə də heç bir səhvə yol vermədi. Hakim sözün həqiqi mənasında meydanın hakimi idi. "Qarabağ"ı qələbə münasibəti ilə təbrik etməklə yanaşı, bütün qrup oyunlarında  ağdamlılara ən azı bu səviyyədə obyektiv idarəçilik arzulayıram”.