“Oyunçularla vizual əlaqəsi, davranışı, qısa dialoqları yüksək səviyyədə idi”

"Matçın gərgin keçəcəyi öncədən bilinirdi. Belə qarşılaşmalarda hakimlər briqadasının da üzərinə böyük yük düşür. Komandalar yaradıcılıqdan çox ilk növbədə rəqibə nəfəs almağa imkan verməmək haqda düşünürdü. Meydanın hər qarışı uğrunda amansız mübarizə gedir, futbolçular arasında ikili mübarizələr çoxluq təşkil edirdi. Təcrübəli baş hakim də buna qarşılıq verir, futbolçuların qaydalar çərçivəsində sona kimi oynamasına şərait yaradırdı. Komandalar bir-birinə hörmətlə yanaşsa da, azarkeşlər hakimlərə təzyiq edir, qərarların əksəriyyətini etirazla qarşılayırdı. Buna baxmayaraq, referi psixoloji cəhətdən tam hazır idi və görüşü obyektiv idarə etdi, prinsipiallıq göstərdi. Sarı vərəqələrin də hamısı haqlı idi. Futbolçular meydanda onun nüfuzunu qeyd-şərtsiz qəbul edirdilər. Oyunçularla vizual əlaqəsi, davranışı, qısa dialoqları yüksək səviyyədə idi. Əlavə vaxtda futbolçular yorulduğu kimi, referidə də fiziki geriləmə hiss olunurdu. Bir-iki epizodda topun ona dəyməsi bunun nəticəsi idi. Ümumilikdə hakimlər briqadası işlərinin öhdəsindən layiqincə gəldi. Oyunun son nəticəsini nəzərə alanda Bakıdakı görüşdə qola çevrilməyən penalti təəssüflə yada düşür".