“13-ci dəqiqədəki epizodu hakim görürdü və dərhal reaksiya verərək qayda pozuntusunu qeydə aldı. Cərimə zərbəsi mübahisə doğurmasa da, qayda pozuntusunun xəttin üzərində, yoxsa xətdən içəridə olması şübhəli idi. Referi epizodun başlanğıcını əsas gətirərək verdiyi qərarın üzərində qayandı, məsuliyyəti boynuna götürdü. Eynilə Yankoviçin qırmızı yox, sarı vərəqə alması da isveçlilərdə narazılıq doğurub. Hakimlik adına belə anlar sarı və qırmızı arası vərəqə sayılır. Referi oyunun mahiyyətini, səviyyəsini nəzərə aldı, epizod şəksiz qırmızıya çəkmədiyinə görə vəziyyəti düzgün qiymətləndirdi və oyunun sonrakı axarını pozmadı. Burda ağdamlı futbolçuların rəqib oyunçular və baş hakim ilə düzgün dialoqu, ünsiyyətin qurulması da psixoloji cəhətdən müsbət rol oynayırdı. "Həkken"in baş məşqçisinin hakimlikdən narazılığının ciddi əsası yoxdu, "Qarabağ" ilk dəqiqələrdən dominant futbol sərgiləyərək haqq etdiyi qələbəni qazandı. "Qarabağ" ilk dəqiqələrdən meydanboyu pressinq tətbiq etdiyi üçün dinamik oyunla yanaşı, ikili mübarizələr çoxluq təşkil edirdi. Komandalar, rəqib futbolçular bir-birinə hörmətlə yanaşsa da, belə oyunlar referidən böyük diqqət tələb edir. Avstriyalı baş hakim oyunçulara sona qədər mübarizə aparmağa imkan verir, fitdən tez-tez yararlanmır, “üstünlük” prinsipindən çox yaxşı istifadə edirdi. Belə idarəçilik tərzi görüşün tempini qoruyur, daha da baxımlı edirdi. 27-ci dəqiqədə Zubirə qarşı açıq kobudluqdan sonra “üstünlük” prinsipindən yararlanan referi epizod bitəndən sonra isveçli futbolçunu bağışladı. Bundan dərhal sonra Yankoviçin dirsək zərbəsi haqlı olaraq sarı vərəqə ilə yekunlaşdı.

Fasilədən sonra oyunun sürəti daha da artdı, "Həkken" də "Qarabağ" kimi rəqib meydanında pressinqə keçdi. Referi ikili mübarizələri yaxşı sezir, demək olar ki, qərarlarda səhvə yol vermirdi. Baş hakimin köməkçiləri və VAR otağı ilə sinxron əlaqəsi də yerində idi. Silvanın üzünə əl hərəkəti zamanı susqunluğu isə referinin yerli komandanın və tribunaların könlünü almaq cəhdi kimi də dəyərləndirmək olar. İsveçli futbolçular hakimin psixoloji jestini dərk etmədiyi üçün dərhal da mübahisəyə görə qarşılarında sarı vərəqə gördülər. Baş hakimin ədalətli, obyektiv idarəçiliyi ilə "Qarabağ" birnəfəsə, əzmkar oyunla layiq olduğu qələbəni qazandı".