18 sarı, 1 qırmızı vərəqə - premyer-liqada 16-cı turun cəza dosyesi belədi.

"Football-plus.az" xəbər verir ki, tur o qədər də kobud mübarizə şəraitində keçməyib. Emil Səfərova göstərilən yeganə “qırmızı” da birbaşa deyildi, 2-ci “sarı”nın nəticəsi idi. Amma söhbət hakim qərarlarından gedirsə, Əliyar Ağayevin “Neftçi”nin 3-cü qolunu saymaqla “Turan Tovuz”dan cari mövsümdə artıq neçənci dəfə narazılıq sədasının eşidilməsini səbəbkar olduğun deməliyik.

Neftçi – Turan Tovuz, ƏLİYAR AĞAYEV
Oyunun gərgin keçəcəyi və FİFA referisinin verəcəyi qərarların da diqqət mərkəzində olacağı bəlli idi. İlk yarıda Əliyar Ağayev hansısa mübahisəyə açıq qərar vermədi. Baş hakim hər iki tərəfin futbolçuları qayda pozuntusu edərkən fiti səsləndirsə də, bakılıların xeyrinə qərarlar verəndə tovuzlu azarkeşlər "Əliyar, "Neftçi"nin formasını gey" kimi şüarlar səsləndirirdi. Referinin birmənalı qarşılanman qərarı 73-cü dəqiqəyə təsadüf etdi. "Neftçi"dən Olanare komandasının 3-cü qolunu vursa da, Əliyar Ağayev qolu təsdiq etmədi. Bir qədər sonra VAR otağından epizodun yenidən incələnməsiylə bağlı xəbər gəldi. Təxminən 2 dəqiqə çəkən yoxlamadan sonra VAR-da əyləşən hakimlər qolun qaydalar çərçivəsində vurulduğunu dedi. Meydandakı əsas hakim həmkarlarının qərarına skeptik yanaşmayaraq onlarla həmfikir oldu və mərkəzi göstərdi. Ağayevin monitora yaxınlaşmamasını, epizodu şəxsən incələməməsini Turan Tovuz" düşərgəsi etirazla qarşıladı. Tovuzluların fikrincə, qolla nəticələnən hücumun əvvəlində “Neftçi”nin oyunçusu tovuzlularlan Fərid Nəbiyevin üzərinə iki ayaqla hücum edib. Təsadüfi deyil ki, “Turan Tovuz”un baş məşqçisi Ayxan Abbasov da oyunsonrası mətbuat konfransında referini qınadı.

Zirə - Araz-Naxçıvan, RƏŞAD ƏHMƏDOV
Oyunun gərgin keçəcəyi öncədən bəlli idi. Hər iki tərəf ötən tur uğursuzluğa məruz qalmışdı. İlk yarıda Rəşad Əhmədovun işi çox olmadı. Baxmayaraq ki, qeydə aldığı qayda pozuntularına hər iki baş məşqçi etirazla cavab verirdi. İlk yarıda hakim bir dəfə əlini cibinə atdı. Fasilədən sonra isə iki dəfə diqqət mərkəzinə düşdü. 80-ci dəqiqədə "Zirə"nin hücümu zamanı rəqib futbolçu avtoqol müəllifi oldu. Amma ədalət təmsilçisi qolu təsdiq etməyə tələsmədi. Qol 3 dəqiqə VAR otağında təhlil ediləndən sonra ofsayd qeydə alındı. Digər epizod isə 85-ci dəqiqədə Stefan Akanın cərimə meydançasında Orxan Əliyevə qarşı kobudluq və penalti ehtimalı ilə bağlı idi. VAR-dakı hakimlər yekun qərar verə bilmədiyindən baş hakim özü monitora yaxınlaşdı və hər şeyin qaydalar çərçivəsində olduğunu bildirdi. Rəşad Əhmədovun ümumilikdə oyunu ədalətli idarə etdiyini deyə bilərik.

Qəbələ - Kəpəz, İNQİLAB MƏMMƏDOV
Autsayderlərin görüşü təcrübəli hakim İnqilab Məmmədova həvalə olunmuşdu. Ədalət təmsilçisi matçı normal idarə etdi. Onun ciddi səhvlə yadda qaldığını demək doğru olmaz. Lakin bəzi epizodlarda daha təmkinli olsaydı, matçın daha sürətli keçməsinə yardım edə bilərdi. Bəlkə də bəziləri Məmmədovu Emil Səfərova “qırmızı” göstərdiyinə görə qınayır, amma qətiyyən belə olmamalıdı. Çünki gənc futbolçu istəkli görünsə də, kobud qayda pozuntularına yol verdi. Ümumiyyətlə, “Qələbə”nin həm məşqçi, həm də komanda heyəti səbrsiz görünürdü. Baş hakim yerində cəzalarla idarəetməni əldən verməyərək, özünü tənqid atəşindən qorudu.

Sabah – Səbail, ELÇİN MƏSİYEV
Məhsuldar və bir tərəfin aşkar üstünlüyü şəraitində keçən oyunda hakim qərarlarının bir o qədər diqqət mərkəzində olmaması təbiidi. Məsiyev oyunu normal idarə etdi, matç boyunca iki dəfə əlini cibinə atdı. İlk sarı vərəqə 38-ci dəqiqədə Belfodilə qarşı kobudluq edən Bardeaya göstərildi. Məsiyev 42-ci dəqiqədə də Hadudiyə qarşı kobud oynayan Ramalinqomu cəzalandırdı. Bu məhsuldar oyunda referin üzərinə böyük yük düşmədi.

Sumqayıt – Qarabağ, FƏRİD HACIYEV
Həm məhsuldar, həm də təhlükəli vəziyyətlərlə zəngin oldu. İlk hissənin son dəqiqəsində “Qarabağ”ın penaltisi verilmədi. Referi epizodu gördüyünü və qayda pozuntusu olmadığı bildirdi. Videotəkrarda Juninyonun ayağına yüngül toxunuş olduğunu gördük. Adətən, belə hallarda penalty qərarı çıxmır. 62-ci dəqiqədə Muratanın yerdə qaldığı epizodda da baş hakimin fiti “susdu”. Topa çatmayan Yankoviç özünü rəqibə çırparaq hücumun qarşısını kəsdi. Lakin Hacıyev penaltinin olmadığını bildirdi. Ümumilikdə referi oyunu ideala yaxın idarə etdi.