"Zirə" - "Araz-Naxçıvan" oyununun heç-heçə bitməsi tərəflərin qələbə həsrətini uzatdı.

"Football-plus.az" xəbər verir ki, oyundan sonra qonaqların yarımmüdafiəçisi Nicat Süleymanovla komandanın çıxışı və başqa mövzular ətrafında söhbət etdik.

- "Zirə" ilə oyundan qolsuz bərabərliklə ayrıldız. Oyunla bağlı fikirlərin maraqlıdı...
- Gərgin oyun oldu. Hər iki komandanın qol vurmaq üşün şansları oldu. Meydanda yaxşı mübarizə apardıq. Hesab edirəm ki, ədalətli nəticə oldu.

- 5 oyundu qələbəyə həsrətsiz. Səbəb nədi?
- Yola saldığımız 5 turdakı görüşlərimizə, əsas da son 3 matçımıza diqqət etsəz, görərsiz ki, meydanda rəqiblərimizdən üstünük. Maksimum irəlidə çıxış etməklə qol axtarışında oluruq. Sadəcə, bəxtsizlikdən, ya nədəndi bilmirəm - fürsətlərdən cəmi birini qola çevirə bilirik. Komandamızda hər şey qaydasındadı məşqlərdə yaxşı əhval-ruhiyə ilə çalışır, meydanda sona qədər “diş göstəririk”. Qarşıdakı turlarda qələbə qazanmaq üçün əlimizdən gələni edəcəyik.

- Oyuna ehtiyatdan qoşulursan. Yaxşı formada deyilsən?
- Formamın necə olub-olmadığı haqda başda Azər müəllim olmaqla məşqçi korpusu nəsə deyə bilər. Mənim bu haqda danışmağım düz çıxmaz. İstər ilk "11-lik"də, istər fasilədən sonra, istərsə də 5-6 dəqiqə meydanda olum, fərq etməz. Əsas olan oyuna qoşulub maksimum bacarığımı ortaya qoymaqdı.

- Çoxları "Araz-Naxçıvan"a autsayder kimi baxırdı. Amma geridə qalan turlarda qapazaltı olmayacağınızı göstərdiz.
- Bu gün Azər müəllimi formalaşdırdığı komanda və futbolçulara aşıkadığı oyun fəlsəfəsi göz qabağındadı. O, yalnız baş məşqçi yox, həm də böyük qardaş, dostdu. Biz futbolçular da Azər müəllimin belə qayğıkeşliyini görəndə meydanda daha əzmlə vuruşuruq. Yəni uğurların başlıca səbəbi mehriban kollektivimizin və qayğıkeş baş məşqçimizin olmasıdı.

- Çempionatın səviyyəsi haqda nə deyərdin?
- Premyer-liqanın səviyyəsi qalxıb. Hər tur gərginliyi ilə diqqəti çəkir. Bütün komandalar bacardıqca mübarizə aparır. Başda öz klubumuz olmaqla bütün elita təmsilçilərinə uğurlar arzulayıram.

- Demək istəyirsən ki, "Qarabağ" bu mövsüm asan çempion olmayacaq?
- Yuxarıda dediyim kimi, hər tür ağır, gərgin keçir. Bütün komandalar çalışırlar ki, 90 dəqiqə ərzində xal qoparsınlar. Odu ki, son turlara kimi belə mübarizə gedəcək. Hesab edirəm ki, erkən çempionluğun şahidi olmayacağıq.

- Çempionatın ilk yarısının bitməsinə 2 tur qalıb. Son iki oyunda qarşınıza hansı hədəf qoyulub?
- Biz bütün oyunlada maksimum xal üçün çıxırıq. Qış fasiləsi ərəfəsindəki 2 oyunda da məqsədimiz dəyişməzdi.

- Qarşıda "Qarabağ"ın Avropa Liqasının qrup mərhələsində "Həkken"lə son oyunu gəlir. Necə düşünürsən, təmsilçimiz qrupdan çıxa biləcəkmi?
- "Qarabağ" qitəmiqyaslı yarışlarda uzun illərdi gözəl oyun göstərir. Komandanın isveçlilərlə matçda layiqli qələbə qazanıb qrupdan çıxacağına inanıram.

- Yığmanın “sükanı arxasına” yerli, yoxsa əcnəbi baş məşqçi gətirilməlidi?
- Nəsə deməyim düz çıxmaz. Aidiyyatı qurumlar var, onlara bu yöndə sual versəz, daha yaxşı olar.

ABDULLA İSMAYILOĞLU