"Zirə" - "Turan Tovuz" qarşılaşmasında meydan sahibləri 2:1 hesabıyla qalib gəldi.

“Football-plus.az” xəbər verir ki, qonaqların təcrübəli qolkiperi və kapitanı Kamal Bayramov oynamaq şansı qazanmasa da, kənardan komandasına dəstək verənlərdən idi.

- Oyunla bağlı fikirlərin maraqlıdı. Qələbə qazanmağınıza və ya heç-heçə etməyinizə nə mane oldu?
- Ötən tur "Neftçi"yə doğma meydanda məğlub olandan sonra bugünkü oyuna çox ciddi hazırlaşmışdıq. Amma bir çox futbolçunun, əsas da Şəhriyar Əliyevin sıradan çıxması vəziyyətimizi xeyli çətinləşdirdi. Buna rəğmən, "Zirə"dən xal götürmək istəyirdik. Oyuna pis qoşulmadıq, qol və qollar vurmaq üçün şanslarımız da vardı. Amma yalnız birini reallaşdırdıq. Əvəzində isə heç nədən 2 qol yedik. Ümidimizi itirməməli və son iki oyundakı yenilgilərdən dərs çıxarmalıyıq.

- Ardıcıl iki məğlubiyyət futbolçularda ruh düşkünlüyü yaratmayacaq?
- Maksimum çalışırıq ki, ruh düşkünlüyü atmosferinə düşməyək. Çünki hələ çempionatda cəmi bir dövrə geridə qalıb, irəlidə isə 3 dövrə var. Yəni marafon uzundu. İndidən mənəvi düşkünlük yaşasaq, gərək təslim olaq. Odu ki, irəli baxır və addımlayırıq.

- Artıq ilk dövrə başa çatdı, amma hələlik şans qazanmamısan...
- Start heyətində kimin yer almasına baş məşqçimiz qərar verir. Hər birimiz də onun qərarına, seçiminə hörmət edirik. Mən, Aydın, Tərlan hər birimiz çərçivədə işinin öhdəsindən gələ biləcək qapıçılarıq. Nə vaxt şans verilsə, bacardığmı göstərəcəm. Amma düşünürəm ki, əsas kimin oynaması yox, komandamızın uğurudu.

- Uzun fasilədən sonra Tərlan Əhmədli qapıda dayandı. Həmkarının çıxışı haqda nə deyərdin?
- Tərlan yetərincə təcrübəli qapıçıdı. Xeyli vaxtdı oynamasa da, bugünkü matçda praktikasızlığı hiss olunmadı. Qarşılaşmanı pis keçirmədi.

- İlk dövrəni 6-cı pillədə tamamladız. Bundan daha yaxşı nəticə göstərə bilərdizmi?
- Komandamız hazırda öz tonusunda deyil. Bundan daha yaxşısına layiqik. Odu ki, irəlidəki oyunlarda maksimum nəticələr göstərməyə çalışacağıq. İrəlidə millimizin oyunları ilə bağlı fasilə yaranacaq. Bundan maksimum istifadə etməklə çatışmazlıqları aradan qaldırmalıyıq.

- Yeri gəlmişkən, yığmamızdan nə gözləyirsən?
- Sadəcə, uğurlar arzulayıram

ABDULLA İSMAYILOĞLU