Yola saldığımız 13-cü turda "Qəbələ" Zirə səfərindən də məğlub ayrıldı.

"Football-plus.az" xəbər verir ki, "qartallar"a uduzan bölgə təmsilçisi sonuncu piləyə yuvarlandı. Həm "Zirə" ilə oyun, həm də son 4 turda cəmi 1 xal toplayan "qırmızı-qaralar"ın uğursuzluğu ilə bağlı kapitanı Urfan Abbasovla danışdıq.

- Oyunla bağlı fikirlərin maraqlıdı.
- Gərgin oyun oldu. Çox çalışdıq, vuruşduq, amma istədiyimiz nəticə hasil olmadı. Zirəyə ən azı 1 xal üçün gəlmişdik. Rəqib bir penaltiylə bizi üstələdi.

- Qapınıza haqlı yerə penalti təyin olundu?
- Açığı, epizoda baxmamışam. Amma baxanlar deyir ki, mübahisəli epizoddu. Yəni penalti verilməyə də bilərdi.

- Son 4 oyuna cəmi 1 xal toplamısız.
- Məyus durumdayıq. Meydanda uğursuzluğa düçar olmamaq üçün çox çalışırıq, amma nədənsə istədiyimiz nəticəni qazana bilmirik.

- Azarkeşləriniz Asif Məmmədova etirazını bildirdi. Getdikcə 12-ci oyunçunu itirirsizmi?
- Yola saldığımız 13 turda cəmi 2 qələbə, 2 heç-heçə əldə etmişik. Qalan oyunlarda məğlub olmuşuq. Təbii ki, fanatlarımız narazıdı və haqlıdı. "Qəbələ" tarix yazan klubdu. O sonuncu yerdə olmağı haqq etmir.

- Qarşıda "Turan Tovuz"la ev oyununuz var. Həmin matçda nəyə ümid edirsiz?
- Millimizin oyunları ilə bağlı ikihəftəlik fasilə yaranacaq. Bu vaxtdan maksimum istifadə etməyə, toparlanmağa çalışacağıq. İnşallah, doğma meydanda uğur qazanacağıq.

- Uğursuzluq zolağında olmağınızı nə ilə izah edərdin?
- Buna cavab verməkdə çətinlik çəkirəm. Bircə onu deyim ki, qara zolaqdan çıxmaq üçün çox çalışırıq. Bundan sonra da təslim olmayacağıq.

ABDULLA İSMAYILOĞLU