Dünən Misli premyer-liqasında 2-ci turdan təxirə salınan "Sumqayıt" - "Sabah" oyunu keçirildi. 1:0 hesabıyla qalib gələn "kimyaçılar"ın heyətində ən yaxşılardan biri Rövlan Muradov idi. Onunla həm bu matç, həm 1-ci dövrədəki çıxışı haqda söhbət etdik.

- Rövlan, bu gün ağır oyunlardan birini keçirdiz. Fikirlərin maraqlıdı...
- Həqiqətən də çox ağır matç oldu. 3-4 gündən bir oyuna çıxırıq. Hazırda sıx qrafiklə gedirik. Buna rəğmən, qələbəyə köklənmişdik və şükürlər olsu ki, buna nail olduq.

- Bugünkü oyunda komandanın ən yaxşılarından idin. Həm bu matçda, həm də 1-ci dövrədəki çıxışın ilə bağlı nə deyərdin?
- Səmimi deyim ki, ümumi götürəndə hazırkı çıxışımdan tam razı deyiləm. Amma "Sabah"la oyunda nə qədər yaxşı oynadığımı məşqçilərimiz daha obyektiv qiymətləndirə bilər. Mənim üçün əsas olan məşqlərdə üzərimdə çalışıb meydanda maksimum can qoymaqdı.

- "Qəbələ"dəki Rövlanla indiki Rövlan arasında fərq varmı?
- Əlbəttə, fərq var. Oyunumda inkişaf hiss edirəm. Amma tam istədiyim formada deyiləm.

- "Sumqayıt"da məhsuldarlığınla seçilirsən. Həmçinin çempionatda ən çox assist edənlərdənsən. Qollar vurmağı və qol ötürmələri etməyi qarşına hədəf qoymusan, yoxsa əsas komandanın qələbəsidi?
- Təbii ki, komandamızın uğuru əsasdı. Amma qarşıma maksimum çox qol vurmaq və yoldaşlarımın fərqlənməsinə vasitəçi olmaq hədəfi də qoymuşam.

- Qarşıdakı oyunlar haqqında nə düşünürsən?
- Çempionat marafonu hələ uzundu. Hər turda bizi ağır oyun gözləyir. Hər görüşə maksimum xal toplamaq üçün çıxacağıq. Bunun üçün məşqlərdə səylə çalışmaq, Samir müəllimin göstərişlərini diqqətlə yerinə yetirmək və uğursuz oyunlardan nəticə çıxarmaq vacibdi. 4 gün sonra doğma meydanda "Qəbələ" ilə ağır matçımız var. Həmin qarşıdurmadan üzü ağ çıxmağa çalışacağıq.

- Hazırda yaxşı çıxış etsən də, De Byazinin diqqətini çəkməmisən. Yığmaya dəvət gözləyirsənmi?
- Əlbəttə, gözləyirəm. İrəlidəki oyunlarda maksimum yaxşı çıxış etməklə De Byazinin diqqətini cəlb etməyə çalışacam.

- Avrokubokdakı yeganə təmsilçimiz "Qarabağ"ı səfərdə Bayer-04"lə ağır oyun gözləyir. "Köhlən atlar"dan nə gözləyirsən?
- "Bayer-04" çox güclü komandadı, Avropada da sözünü deyib və deyən klubdu. Buna rəğmən, nikbininəm. Almaniya təmsilçisi top-liqa komandası olsa sa, "Qarabağ"ın heç-heçə edəcəyini gözləyirəm.

ABDULLA İSMAYILOĞLU