"Həyatda qalmaq şansı 20 faiz idi, çox qan itirmişdi"
Maliyyə problemi yaşadığı üçün dağılma astanasında olan "Xarı Bülbül" daha bir xoşagəlməz hadisə ilə üzləşdi. Şuşa təmsilçinin əsas üzvü Tural Həsənli daxili qanaxma və bağırsaq partlaması nəticəsində əməliyyat olundu.
Təcrübəli oyunçunun son durumu haqda məlumat almaq üçün komandanın baş məşqçisi Ziya Rəcəbovla əlaqə saxladıq:
"Turalın mədə-bağırsağında əvvəl də problem var idi. Təyyarədə olanda özünü pis hiss edirdi. "Panatinaikos"la cavab görüşündə meydana çıxdı və bir set almağımızda bizə çox kömək oldu. O uşağa halaldı ki, ağrıları da olsa, sona qədər mübarizə apardı. Bakıya çatan kimi Sabunçu xəstəxanasına aparsaq da, bizi qəbul etmədilər. Özəl klinikaların birinə yerləşdirdik. Həyatda qalmaq şansı 20 faiz idi. Çox qan itirmişdi. Allaha min şükür, indi yaxşıdı. Yanına getməyə icazə yoxdu. Arada bir neçə dəqiqə telefonla danışıram. Tanrıya çox şükür, Turalı yenidən bizə qaytardı".
Rəcəbov "Xarı Bülbül"ün gələcək taleyi ilə bağlı da bunları dedi:
"Təəssüf ki, vəziyyət gündən-günə gərginləşir. Çünki komandanın heyətində olan legioner oyunçuların ev kirayəsi, qidalanması var. Biz gedib ev sahibinə deyə bilmərik ki, iki ay möhlət ver, düzələcək. Sponsor təklifi edən şirkət də yoxdu. Lakin ölkə çempionatındakı oyunlara çıxacağıq".
CAVİD ƏLİYEV
Digər xəbərlər
