Türkiyə Futbol Federasiyasının nəzdində fəaliyyət göstərən Feyr Pley və Sosial Məsuliyyət Komitəsinin son toplantısında oktyabr üçün müxtəlif nominasiyalarda “feyr-pley” mükafatının qalibləri məlum olub.

“Football-plus.az” xəbər verir ki, ən centlmen baş məşqçi Nuri Şahin, ən centlmen azarkeş “Qalatasaray” fanatları, ən centlmen futbolçu Fernando Muslera, ən centlmen idarə heyəti isə “Fənərbaxça” rəhbərliyi seçilib. “Qalatasaray” fanatları oktyabrın 21-də “Beşiktaş”la derbidə tribunada təxminən 7 dəqiqə davam edən və Türkiyə cümhuriyyətinin 100 illik yubileyinə həsr olunan möhtəşəm 3D xoreoqrafiyası hazırladıqlarına görə bu ada layiq görülüblər. Onların bu performansını hətta həmin gün stadiondakı “Beşiktaş” fanatları da alqışlamışdı. Fernando Muslera “Qalatasaray” – “Beşiktaş” derbisində bir epizodda hətta özünün zədə almaq təhlükəsi olmasına baxmayaraq, rəqib oyunçu Valentin Rozyeni qorumaq məqsədilə onun dirəyə çırpılmasının qarşısını kəsdiyi üçün bu mükafata layiq görülüb. “Fənərbaxça” rəhbərliyi ötən ay bir neçə sosial layihə həyata keçirdiyinə görə mükafat qazanıb. Məsələn, rəhbərliyin qərarı ilə “Hatayspor”la ev oyununa futbolçular “Evinizə xoş gəldiz, “Hatayspor” pankartı ilə çıxmışdılar. Bundan başqa, 1 oktyabr dünya yaşlılar günü münasibətilə uzun illər kluba dəstək verən və uyğun olaraq 2013 və 2020-ci illərdə dünyasını dəyişən İhsan və Mümtaz Güngörənin maketi tribunada yerləşdirilmişdi. Eləcə də cümhuriyyətin 100 illik yubileyi ilə bağlı Kadıköyə ölkənin 81 şəhərindən və Kiprdən torpaq gətirilmişdi.
“Antalyaspor”un çalışdırıcısı Nuri Şahinin qazandığı mükafatın üzərində isə bir qədər geniş dayanmağa dəyər. Çünki burda sual doğuran və hətta absurd məqamlar var. Əvvəlcə qeyd edək ki, gənc mütəxəssis oktyabrda matçlardan öncə və sonra verdiyi açıqlamalara görə “feyr-pley” mükafatına layiq görülüb. Yəni federasiya onu nəticədən asılı olmayaraq hər kəsə hörmətli şəkildə davrandığına, idmanın ruhuna uyğun örnək açıqlamalar verdiyinə görə mükafatlandırıb. Amma burda bir “əmma” var. 2021-dən “Antalyaspor”u çalışdıran Şahinin Pro lisenziyası yoxdu. Bu üzdən o, matçlardan öncə və sonra mətbuat konfranslarında iştirak etmir. Daha dəqiq desək, iştirakına icazə verilmir! Onun əvəzinə bunu köməkçiləri edir. Köməkçisi Joao Tralyaonun qaynanası vəfat etdiyinə görə bir müddət Türkiyədə olmadı. Onun olmadığı müddətdə TFF “Beşiktaş” və “Ankaragücü”nə qarşı oyunlarda Nuri Şahinə mətbuat konfranslarına çıxmağa icazə verdi. Amma məsələ burasındadı ki, sözügedən iki qarşılaşma bu ay keçirilib. Noyabrın 5-də “Beşiktaş”, 10-da isə “Ankaragücü” ilə oyunlardan sonra Şahin mətbuat konfranslarında iştirak edib. Buna baxmayaraq, ona “feyr-pley” mükafatı oktyabr üçün verilib. Halbuki o, oktyabrda komandasının keçirdiyi 3 oyunun heç birində mətbuat konfransında iştirak etməyib və matçlardan sonra açıqlama verməyib! Beləcə TFF mövsümün ən qəribə qərarlarından birinə imza atmış oldu.