"Stadion 2015-ci ildən Gənclər və İdman Nazirliyinin balansındadı. Ötən ilə qədər icarəhaqqını rahat verə bilirdik. Amma sonra ödənişlə bağlı problem yarandı. AFFA-nın bizə ayırdığı aylıq 30 min manat futbolçularımızla məşqçilərin ehtiyacını güclə ödəyir. Stadionun aylıq icarəsi isə 5 mindi. Bir müddət Musa Qurbanovla Qurban Qurbanov əlindən gələn köməyi etdi. Qurban müəllim futbol məkanı ilə bağlı xərclərimizi qarşıladı. Amma hazırda vəziyyət yenə acınacaqlıdı. Ayın 30-na kimi vaxt verilib. Bu vaxta kimi stadiona ödəniş etməsək, ev oyunlarını keçirməkdən məhrum olacağıq. Dünəndən Bakıdayam. Paytaxtda olmağım iki səbəblə bağlıdı. Qurban Qurbanovla bağlı çəkilən filmin premyerasına dəvət almışam, bir də stadionla bağlı problemi aradan qaldırmaq istəyirəm. Əvvəlcə film haqqında danışım. Şadam ki, millimizin sabiq üzvü, ölkə futbolunda misilsiz xidmətləri olan Qurban müəllimlə bağlı film çəkilib. Bir sadə, zəhmətkeş ailədə dünyaya göz açan uşağın üzərində işləməklə hansı səviyyəyə qədər yüksəlməsindən danışılır. Baxdıqca qürurlandım. Qayıdaq stadion məsələsinə. Çox yerə müraciət etmişik. AFFA-ya dərdimizi bildirdik. Onlar artıq bəlli büdcə ayırdığından əlavə pul köməyi mümkün deyil. Amma AFFA-nın baş katibinin köməkçisi Orxan müəllimlə xeyli söhbət etdik. Sağ olsun, söz verdi ki, qısa müddətdə Gənclər və İdman Nazirliyi ilə danışıq aparıb, vəziyyətimizi yaxşılaşdırmağa çalışacaq. Hələlik gözləyirik. Qarşıdan "Şamaxı"yla kubok oyunumuz gəlir. Alternativ variantıar haqda düşünməyi ağlıma gətirmək istəmirəm, bütün fikrim-zikrim stadionla bağlı problemin qısa zamanda həllinə nail olmaqdı".

"Bu vaxta kimi İcra Hakimiyyəti bizim üçün çox iş görüb. Amma nə yazıq ki, Zaqatalanın imkanlı adamlarının futbola yatırım etməsi ənənəsi hələlik formalaşmayıb. Buna çox təəssüflənirəm. İcra başçısına hər dəfə ağız açmaq olmur. Artıq utanırıq. FİF daha çox mənəvi, təbliğat, bilet satışı, reklam xarakterli işlərlə bağlı nəsə etməyə çalışır. Qurum bu istiqamətdə nə qədər çalışsa da, azarkeşlərin stadiona axınına nail ola bilmir. Zaqatalalı azarkeşlərin böyük futbol təcrübəsi var. Onlar həmişə "Simurq"un ifasında elita oyunlarına seyrçilik etdiyindən hazırda aşağı liqa matçlarına maraq göstərmirlər. Zaqatalalıların stadiona axın etməsi üçün premyer-liqada yer almalıyıq".