"Gənclər və İdman Nazirliyi Azərbaycan futbolunun canlı əfsanəsi Qurban Qurbanov haqda film çəkmək təşəbbüsü ilə mənə müraciət etdi. Artıq təcrübəm var idi, son “Olimpiya” filmim də idman mövzusunda idi. Ssenari üzərində işə başladıq, çox qısa müddətdə bitirdik və çəkilişlərə başladıq. Çəkilişlər Bakı və Zaqatalada aparıldı. Filmin çəkilməsi mənə həvalə ediləndə 90-cı illərdəki məktəb illərimə,  gəncliyimə qayıtdım. Həmin dövrdəki futbolumuzla bağlı yetərincə bilgi toplamağa çalışdım. İnternetdə, sosial şəbəkələrdə olan 80-90-cı illərdəki çempionat oyunlarını, o cümlədən Qurban Qurbanovun matçlarını izlədim. Bunun nəticəsində beynimdə artıq ssenarini qurmuşdum. Film real hadisələrdən bəhs edir. Sadəcə, həmmüəliflərlə süjet xətlərini bədiiləşdirdik. Qurban müəllimin özü ilə 1 saat söhbət etdik. Bundan başqa, həmin dövrün veteran futbolçuları, o cümlədən Musa Qurbanov, Yunis Hüseynov ilə görüşlərimiz oldu. Qurban müəllimin ilk məşqçisi Şaban Şirdanovla danışıqlarımız oldu. Eləcə də millimizin sabiq "9 nömrə"sinin rəhbərliyi altında çıxış edən Maksim Medvedev, Qara Qarayev və başqa futbolçular ilə söhbətləşdim. "Qarabağ"ın bir neçə matçlarında da iştirak etdim. Klubun yaratdığı atmosferi yaxından hiss etməyə çalışdım. Tammetrajlı bədii filmin  quruluşçu rejissoru mənəm. Ssenari müəllifləri mənlə yanaşı, Rüstəm Babazadə, Azər Quliyev və Nicat Muxtarovdu. Rollarda Səmimi Fərhad, Məmməd Əlili, Nağı Əliyev, Amin Adıgözəlov və başqaları yer alır. Düşünürəm ki, uğurlu ekran işi alınıb. Amma bu mənim fikrimdi, qoy tamaşaçılar da qərar versin”.