Almaniyada yetişməsinə baxmayaraq, Türkiyəni seçən, böyük gələcək vəd edən, Almaniya və Uelsə qarşı son iki qarşılaşmadakı performansı ilə alqış qazanan 18 yaşlı forvard Kənan Yıldızın meneceri Doğan Ərcan Türkiyə mətbuatına diqqətçəkən açıqlamalar verib.

"Football-plus.az" xəbər verir ki, Kənana tərif yağdıran və onu potensialına görə hətta Kriştiano Ronaldoya bənzədən Ərcan Türkiyənin gənclər yığmasının sabiq çalışdırıcısı Tolunay Kafkası tənqid edib: “İndi Kənan bir balaca tanınıb deyə hər kəs ona sahib çıxmaq istəyir. Bu yaxınlara qədər onu heç kim tanımırdı. 1 il öncə gənclər yığmamız Xorvatiyada bir turnirə qatılmışdı. Baş məşqçi Tolunay Kafkas həmin turnirdə onu cəmi 3-4 dəqiqə oynatdı. Əmrəhan Gedikli kimi başqa gənc istedadları da oynatmadı. Allah üzümüzə baxdı ki, Kafkası qovdular. Vəzifəsində qalsaydı, Kənan da ortaya çıxmayacaqdı. Kənan Arda Gülərdən daha istedadlı futbolçudu. Almaniya yığması ona sahib çıxmaq üçün əlindən gələni etdi. Kənanın yerində başqası olsaydı, Tolunay Kafkasın ona münasibətindən sonra çox asanlıqla İtaliya və ya Almaniya yığmasını seçərdi. Yaxşı ki, Kafkas vaxtında qovuldu. Onu əvəzləyən Levənt Sürmə dərhal Kənana şans verməyə başladı. Sonra da Montella gəldi və onu əsas yığmaya cəlb etdi. U-20-də 5 oyunda 5 qol, 3 məhsuldar ötürməlik performans ortaya qoydu. 18 yaşı olmasına rəğmən, artıq “Yuventus”un əsas komandasında oynayır. “Bavariya”nın akademiyasında yetişib. Münhenlilər onu saxlamağa çalışırdılar və hətta yeni müqavilə də təklif etdilər. Amma həmin vaxt orda akademiyadakı uşaqlarla bağlı “vatsap”da irqçi yazışmalar ortaya çıxdı. Bu da Kənana pis təsir etdi. Həm də “Bavariya”nın təklifi çox da ideal deyildi. “Yuventus”la “Barselona” arasında seçim edərək üstünlüyü turinlilərə verdi. Ötən mövsümün gedişində “Benfika” 10 milyon avro təklif etsə də, “Yuve” qəbul etmədi. İstanbul nəhənglərinin ona təklif göndərməsi isə yalandı. Heç birindən təklif yox idi. Maraq göstərmədilər. Bundan sonra onun Türkiyəyə gəlməsi mümkün görünmür. Uzaqbaşı 30 yaşdan sonra superliqada oynaya bilər. Kənan həqiqətən də güclü xarakterə malikdi. “Mən türkəm və Türkiyə yığmasında oynayacam” dedi. Bu qədər haqsızlığa məruz qalmasına rəğmən, sözünün üstündə durdu. Artıq “Yuventus” ona uzunmüddətli müqavilə təklif etməyə hazırlaşır. 5 ay öncə hər kəs Arda Gülərdən danışarkən mən Kənanı ön plana çıxarırdım. İndi kimin haqlı olduğu ortaya çıxdı. İri addımlarla qaçan çox sürətli futbolçudu. İnkişafı da göz önündədi. Onu Kriştiano Ronaldoya bənzədirəm. Onu tutmaq olmur. Hətta pul verib bir qatil də tutsaz, onu tuta bilməz”.

Yeri gəlmişkən, Türkiyə mətbuatının iddiasına görə Montella Almaniyada digər istedadlı qürbətçi gəncləri də diqqətlə izləyir və onları “ay-ulduzlular”a qazandırmağa çalışır. Hazırda onun diqqət mərkəzində saxladığı 2005 təvəllüdlü iki futbolçu var. Söhbət Can Uzunla Efe Kaan Sihlaroğludan gedir. “Nürnberq”in yetirməsi olan və hazırda bu klubun şərəfini qoruyan Can Uzun həm oyunu, həm də fiziki göstəriciləri ilə diqqət çəkir. O, cari mövsümdə 2-ci bundesliqada artıq 5 qol vurub. Oyun qurucusu mövqeyində oynayan Uzunla İstanbul nəhəngləri də maraqlanır. Bu futbolçunun martdakı oyunlar üçün Türkiyə yığmasına dəvət alacağı gözlənilir. “Karlsrue”də forma geyən Sihlaroğu isə yarımmüdafiənin mərkəzində çıxış edir. “Beşiktaş”da top qovan, amma bu mövsüm çox da şans qazanmayan 2005-ci il təvəllüdlü forvard Semih Kılıçsoy da Montellanın diqqət mərkəzindədi. Bundan başqa, cari mövsüm bundesliqada performansı ilə adından söz etdirən Ərən Dinkçinin də seçimi Montellanı sevindirməyə bilməz. “Verder”in yetirməsi olan, bu mövsüm icarə əsasında “Haydenhaym”da top qovan 22 yaşlı forvard son açıqlamasında Türkiyə yığmasında oynamaq istədiyini vurğulayıb. Daha öncə həm Türkiyənin U-19, həm də Almaniyanın U-20 komandalarında çıxış etmiş Dinkçi 2023/24-də 12 rəsmi oyunda 6 qol, 2 məhsuldar ötürmə ilə fərqlənib.