Almaniya futbolunun Türkiyəyə bəxş etdiyi növbəti ulduzlardan biri olacağı gözlənilən Kənan Yıldızın yeni klubunun adına aydınlıq gəlib.

2005-ci il təvəllüdlü istedadlı futbolçu Reqensburq şəhərində doğulub. O 2012-ci ildən, yəni 7 yaşından ''Bavariya''nın akademiyasında top qovurdu. Yarımmüdafiənin həm mərkəzində, həm də cinahlarında oynamağı bacaran Yıldız ilk dəfə ötən mövsüm adından söz etdirdi. O, ''Bavariya''nın U-17 və U-19 komandasında bütün turnirlərdə 20 oyunda meydana çıxaraq 6 qol, 8 məhsuldar ötürməlik performansla diqqəti çəkdi. Türkiyənin U-17 yığmasında isə 6 oyuna 2 qol vurdu. Onun münhenlilərlə müqaviləsinin müddəti bu yay başa çatırdı. Belə güman olunurdu ki, ''Bavariya'' Kənanla peşəkar səviyyədə ilk müqaviləsini imzalayaraq onu əsas komandaya dəvət edəcək. Amma tərəflər maddi məsələlərdə anlaşa bilmədi. Klubun idman direktoru Hasan Salihamiciç bir neçə gün öncə Kənana təriflər yağdırsa da, futbolçunun maddi tələblərini qarşılaya bilmədiklərini və bu üzdən onun komandanı tərk edəcəyini etiraf etmişdi. ''Barselona'', ''Ayaks'' və ''Fənərbaxça''nın da maraq göstərdiyi yeniyetmə futbolçu İtaliyaya yollanmaq qərarına gəlib. İtaliyalı jurnalist Nikola Skiranın verdiyi məlumata görə, Kənan ''Yuventus''la anlaşıb.

Tərəflərin hazırda son detalları müzakirə etdiyi məlum olub. Bu keçid qarşıdakı günlərdə rəsmən açıqlanacaq.