TFF başqanı “altyapı”dakı problemləri sadaladı
Türkiyə Futbol Federasiyasının prezidenti Mehmet Büyükekşi 2020-ci ilin avqustundan bəri “altyapı” direktoru və U-21 yığmasının baş məşqçisi vəzifəsini icra edən Tolunay Kafkası sərt sözlərlə tənqid atəşinə tutub.
Football-plus.az xəbər verir ki, Qaziantepdə keçirilən Türkiyə - Çexiya oyunundan öncə türkiyəli həmkarlarımıza açıqlamalar verən Büyükekşi bunları deyib:
“Bizim “altyapı” sistemimizdə ciddi yanlışlıqlar var. Aşağı yaş qruparında, eləcə də U-21-də oynayıb pillə-pillə yüksələn, sonra da əsas yığmaya yollanan futbolçumuz, demək olar, yoxdu! Ştefan Kunts Şotlandiya ilə oyundan öncə Tolunay Kafkasla görüş keçirdi. Həmin vaxt Kunts həmkarına “aşağı yaş qruplarındakı yığmalarda əsas komandaya dəvət edə biləcəyim bir futbolçu varmı” sualını ünvanlayıb. Kafkas isə ona “yoxdu” cavabını verib. Bu necə sistemdi? Belə sistem olur? Məsələn, ən son göz bəbəyimiz Arda Gülər Kunts tərəfindən əsas yığmaya dəvət olundu. Amma Arda nə U-15-də forma geyib, nə də U-16-da. Birbaşa U-17-yə, ordan da yığmaya çağrılıb. Eyni sözlər Əmirhan İlkhana da aiddi. Halbuki oyunçular bu sistəmdə nərdivanları bir-bir qalxmalı, maneələri bir-bir dəf etməlidi. Mən məhz bu cür sistemin olmasını istəyirəm. Yoxsa, hər yığmanın ordan-burdan oyunçular tapıb gətirməsi düzgün deyil. Digər problem yığmalarda fərqli bölgələrdən yeniyetmələrimizin olmamasıdı. Bir çox valideynlər bizə zəng vuraraq narazılıqlarını bildirir. Onlar övladlarının yığmada oynamalı olduğunu, amma bunun baş vermədiyini deyirlər. Çox güman, burda qohum, dost-tanış məsələləri ön plana çıxır. Mən də fikir verirəm ki, həqiqətən də yığmalarda uşaqlar cəmi 3-4 zonadandı. İstanbul, Ankara, İzmir və Trabzondan başqa, demək olar, heç yerdən oyunçu yoxdu. Varsa da, istisna haldı. Halbuki digər bölgələrdə də çox istedadlı uşaqlarımız var”.
Belə ağır ittihamlardan sonra Tolunay Kafkasın nə qərar qəbul edəcəyi böyük maraqla gözlənilir. Ümumiyyətlə, 54 yaşlı bu mütəxəssisin “altyapı”da gördüyü işlərlə bağlı narazılıqlar hədsiz dərəcədə çoxdu. Gənc komandalarda nəhəng turnirlər ərəfəsində heyət seçimi daim tənqid olunur. Mövsümün əvvəlində Yusuf Dəmirin “Qalatasaray”a transfer olunmasından sonra onun necə əldən çıxması və nə üçün Avstriya yığmasına qismət olması məsələsi aktuallaşdı. Həmin vaxt Kafkas özünü günahkar saymamış və onun sözlərindən belə çıxmışdı ki, Yusufun əldən çıxması Türkiyə yığmasının son iki məşqçisi Şenol Günəşlə Ştefan Kuntsun günahıdı! Ən son “Fənərbaxça”lı İsmayıl Yüksəkin sentyabrda ilk dəfə yığmaya dəvət almasından sonra Kafkas yenə tənqid atəşinə tutuldu. Çünki Jorje Jezuşun bir neçə həftəyə kəşf etdiyi belə istedadlı dayaq yarımmüdafiəçisinin ona qədər heç bir yaş qrupundan ibarət yığmalarda forma geymədiyi məlum olmuşdu. Halbuki İsmayılın peşəkar karyerası hələ 2018-də başlamış və bu ilə qədər o, icarə əsasında başqa klublarda 99 rəsmi oyuna çıxmışdı! Belə misalları çox saymaq olar. Büyüykekşinin son açıqlamasından isə belə bəll olur ki, aşağı yaş qruplarına oyunçular başqa yollarla dəvət alırmış.
Digər xəbərlər
