“Şamaxı”nın özünəməxsus strategiyası var. Klubun maraqları fikirlərimlə üst-üstə düşdüyündən işimə burda davam etməyə qərar verdim. Başqa klublardan da təkliflər var idi, amma adlarını çəkmək doğru olmaz..."

Bu sözlər "Şamaxı"nın sabiq baş məşqçisi Vüqar Əsgərliyə aiddi. Komanda 1-ci liqada çıxış etməyə hazırlaşanda mənlə söhbətdə demişdi. Əlavə etmişdi ki, məqsəd premyer-liqaya qayıtmaqdı. Lakin dünən 9-cu tur matçında evdə "Karvan"a məğlub olandan (2:4) sonra istefa verdi və "şirlər"i baş məşqçisiz qoydu. O, ötən ilin iyulunda bu posta gətirilmişdi. Pro lisenziyasına malik mütəxəssisdən gözləntilər böyük idi. Lakin "Şamaxı" premyer-liqadan aşağı yuvarlandı. Bu, klubun gələcəyi üçün, şübhəsiz, böyük zərbə oldu. Üstəlik ən böyük və etibarlı fanklub "Sektor 56" bu üzdən "şirlər"i boykot etdi. Tərəfdarlar hələ də komandayla barışmayıb.

İndi də Vüqar bəy geriyə baxmadan "ağ bayraq qaldırdı”, sanki qeybə çəkildi. Dünən media nümayəndələri oyun haqda fikirlərini öyrənmək istəsə də, mütəxəssis danışmaq istəməyib. Xeyir ola?! Bilirik, danışmamaq kimi hüququnuz var, lakin "Şamaxı" kimi tarixi olan komandanı aşağı dəstəyə aparandan, azarkeşləri klubdan soyudandan və evdə özündən aşağı pillədə qərarlaşan komandadan 4 qol buraxandan sonra danışmalısan! Daha doğrusu, bunu özünə borc bilməlisən...
Cari mövsümdə komandanın ən çox izlənilən ev matçı 5-ci turdakı "Mingəçevir"lə qarşılaşmadı. Həmin gün "şirlər" 1100 azarkeş önündə 2:3 hesabıyla məğlub olub. Vüqar bəy, bunu "Şamaxı"ya niyə etdiz? Yuxarıda xatırlatdığım açıqlamanıza əsasən görünür ki, günah məhz sizindi. Buna mən də şübhə etmirəm. Çünki rəhbərlik büdcəyə uyğun ən yaxşı futbolçuların komandaya transfer edilməsi üçün şərait yaratmışdı.

Maraqlıdı ki, 1-ci liqanın bombardirləri - Elşad Tağıyev (9) və Emin Zamanov (6) məhz "Şamaxı"nın üzvləridi. Deməli, onlara müvafiq mövqelərdə dəstək lazımdı. Komandanı legionersiz uğur qazanmaq sevdasıyla gündən-günə məhv edirsiz. Premyer-liqadan düşmək sizin üçün təcrübə olmadımı? Görünür, olmayıb... Yoxsa heyətində Anqenor Qnapi, Uensley Ondo və Peter Kinqs kimi əcnəbi futbolçular olan "Karvan"dan 4 "sillə yeməzdiz".

Vüqar bəy, yolunuz açıq olsun. Amma deyəsən, etdiklərinizə görə Şamaxı əhlindən halallıq almağı unutmusuz...

KƏNAN BAHADIR