Sabah millimiz AÇ-2024-ün seçmə mərhələsində Belçikayla üz-üzə gələcək.

"Football-plus.az" xəbər verir ki, AFFA-nın baş katibi Sərxan Hacıyev matçdan öncə jurnalistlərin suallarını cavablandırıb.

- İsveç üzərində inamlı qələbədən sonra millimizdən gözləntilər artıb. Bu dəfə rəqib Belçikadı. Təmsilçimizdən gözləntiniz necədi?
- Qarşı tərəfin adından və gücündən asılı olmayaraq, meydana qələbə üçün çıxmalıyıq. Çünki, İsveçlə oyunda yığmamız inamlı mübarizə aparıb layiqli qələbə qazandı. Amma bu, keçmişdə qalıb. Düşünürəm ki, komandamız İsveçlə matçda olduğu kimi, yaxşı və baxımlı oyun göstərəcək. Millimizin bizi sevindərəcəyinə ümid edirəm. İndi matça köklənməliyik ki, qaneedici nəticə əldə edək.

- Sabah Bəhlul Mustafayev və Ramil Şeydayev meydana çıxmayacaq. Sizcə, bu, komandaya nə dərəcədə təsir edəcək?
- Əlbəttə, hər ikisi millimizin əsas oyunçularıdı. Məncə, onları əvəzləyəcək futbolçular əlindən gələni edəcək ki, işlərini layiqli yerinə yetirsinlər və nəticəyə yaxşı mənada təsir etsinlər.

- Belçikayla matçın nəticəsindən asılı olmayaraq, millimizin AÇ-2024-ün seçmə mərhələsindəki çıxışını necə dəyərləndirirsiniz?
- Düzdü, nəticə komandanın dəyərləndirilməsi üçün əsas amillərdən biridi. Lakin, hər bir turnirdə reallıqları nəzərə almaq lazımdı. Qrupdakı rəqibləri məğlub etmək elə də asan deyil. İlk öncə komandanın göstərdiyi oyuna, çıxışların nə dərəcədə dinamik olub-olmadığına baxmalıyıq.

- Maraqlı məsələlərdən biri də, baş məşqçi Canni de Byazinin bundan sonrakı taleyidi. Belçikayla matçın nəticəsi onun gələcəyinə təsir edə bilər?
- Bu barədə nəsə demək çətindi. Məndən əvvəl AFFA-nın prezidenti Rövnəq Abdullayev də bu haqda danışmışdı. Gözləmək lazımdı. Yekun qərarı İcraiyyə Komitəsi verəcək. Yaxın vaxtlarda iclas keçirilməsi nəzərdə tutulur.

- Noyabrın 20-də Qazaxıstanın qazanacağı qələbə bizi pley-off mərhələsinə apara bilər. Bu ehtimalı necə dəyərləndirirsiniz?
- Açığı deyim, seçmə mərhələdən öncə bu şanslar real görsənmirdi. Lakin, elə alındı ki, indi belə şans var. Bunu istisna etmək olmaz. Pley-off mərhələsinə yüksələ bilsək, bizim üçün yeni tarix olacaq.

- Belçika ilə matçda şəxsən sizi hansı nəticə razı sala bilər? Heç-heçə, yoxsa abırlı hesabla məğlubiyyət?
- Birmənalı şəkildə deyə bilərəm ki, hər bir məğlubiyyət - abırlı olsun, ya abırsız - qəbuledilməzdi.

HUŞƏNG