Dünən AÇ-2024-ün seçmə mərhələsində Qazaxıstan gözlənildiyi kimi öz meydanında San Marino üzərində 3:1 hesablı asan qələbə qazandı. Amma qarşılaşmanın başqa bir maraqlı tərəfi var.

Dünyanın ən zəif yığmalarından olan San Marino ardıcıl 2-ci qarşılaşmada qol vurmağa müvəffəq oldu. Ötən ilin noyabrında Sent Lusiya yığması ilə görüşdə fərqləndikdən sonra ardıcıl 8 qarşılaşmada qola həsrət qalan San Marino bu seriyaya ötən ay səfərdə Danimarka ilə görüşdə (1:2) son qoymuşdu. Bu dəfə isə bu komanda səfərdə Qazaxıstana qarşı oyunu da qolsuz tərk etmədi.

Müqayisə üçün deyək ki, bizim yığmamızın bu seçmə mərhələdə ardıcıl 2 oyunluq qol vurmaq seriyası olmayıb! San Marinonun sonuncu dəfə ardıcıl 2 oyunda fərqlənməsinə 2005-ci ildə rast gəlinib. O vaxt bu komanda DÇ-2006-nın seçmə mərhələsində Belçikaya (1:2) və Bosniya və Herseqovinaya (1:3) qol vurmuşdu.

ƏLİ