"Oyunu qadın baş hakim idarə etsə də, ilk dəqiqələrdən meydanda,  futbolçular qarşısında zəhmli olmağa çalışır, qəti, inamlı qərarlar verməkdən çəkinmirdi. Elə ilk qolda referi obyektivliyi, incə epizodları ayırd edə bilməsi ilə oyunçular tərəfindən özünə qarşı simpatiya qazanmış oldu. Lindelöfun aşırı özünəinamından, çaşqınlığından istifadə edən Renat Dadaşov top uğrunda ikili mübarizəyə qoşuldu, qaydalar çərçivəsində üstün oldu. Bu anda müdafiəçi çətin vəziyyətə düşərək hücumçumuzu əllə tutub saxlasa da, müqavimətini itirən Renat yıxılma anında, çətin epizodda Emin Mahmudova ideal ötürmə verdi. Ədalət təmsilçisi epizodu düzgün qiymətləndirərək “üstünlük” prinsipinə söykəndi, “davam” işarəsi verdi. İlk qolun vurulmasında baş hakimin bacarığı qeyd edilməlidi. Oyunda referi - VAR otağı anlaşması, sinxronluğu da təqdirəlayiq idi. Kritik anlarda doğru qərarlar verilir, ehtiyac olanda operativ məsləhətləşmədən sonra meydanda obyektivlik təmin edilirdi. Bəhlul Mustafazadənin epizodu qeyd olunanların təsdiqidi.

Baş hakimin ən böyük səhvi 27-ci dəqiqəyə təsadüf etdi. Qapıçı meydançasında,  hava topu uğrunda mübarizədə Şahruddin Məhəmmədəliyevə qarşı rəqib kobudluq etmişdi. Nə yaxşı ki, epizod qolla nəticələnmədi. Oyunda VAR sisteminin mükəmməl çalışdığını nəzərə alsaq, hətta top qapıdan keçsəydi belə, epizod incələnəcək, çox güman, ədalətli qərar veriləcəkdi. 

Referi futbolçularla şifahi ünsiyyətə həssas yanaşır, bəzi hallarda aşırı fasilələr yaransa da, oyunçulara fikirlərini çatdıra bilirdi. İsveç millisinin baş məşqçisinə göstərilən sarı vərəqə isə qadın referinin "meydanda mən varam" qətiyyətinin  göstəricisi idi. Ümumilikdə oyunda sərt, kobud mübarizələrə üstünlük verilmirdi, rəqib futbolçular bir-birinə hörmətlə yanaşırdı, bu amil də hakimin oyunu daha rahat idarə etməsinə zəmin yaradırdı”.