Tahir Süleymanov latviyalıların çətinliklə üzləşmədiyini düşünür
"Qarabağ" "Linkoln"la səfər qarşılaşmasında çətin anlar yaşadı.
"Football-plus.az" xəbər verir ki, rəqibin hesabı açmasına mane ola bilməyən təmsilçimiz sonradan vurduğu iki qolla qələbəni təmin etdi.
Oyunda ədaləti Vitali Spasennikovun rəhbərlik etdiyi, Latviyadan olan hakimlər briqadası qoruyurdu. 90 dəqiqə ərzində mübahisəli qərarlar diqqətimizi çəkdi. Məsələn, 7-ci dəqiqədə cərimə meydançasında rəqib futbolçu Veşoviçlə top uğrunda mübarizədə serbiyalıya qarşı kobud oynadı. Referi öncə cərimə meydançasının kənarında qayda pozuntusu qeydə aldı. Bir qədər sonra isə VAR-dan siqnal gəldi və monitora yaxınlaşaraq Veşoviçin kobud oynadığını elan etdi. 25-ci dəqiqədə komanda yoldaşından uzun ötürmə alan Qomes Medina ilə mübarizədən qalib ayrılaraq hesabı açdı. Bu zaman həm ofsayd, həm də müdafəçiyə qarşı kobud oyun olduğu ehtimalı yarandı. Lakin baş hakim qolun qaydalar çərçivəsində vurulduğunu bildirdi. Ədalət təmsilçisi xırda follara göz yummur, “üstünlük” prinsipinə əməl etmirdi. Oyun ərzində itirilən vaxtı düzgün kompensasiya edərək ilk yarıya 5, ikinciyə 4 dəqiqə əlavə etdi.
Ümumilikdə hakimlərin idarəçiliyini qiymətləndirmək üçün təcrübəli referi Tahir Süleymanovun fikirlərini öyrəndik:
"Kiçik qəsəbə stadionunu xatırladan arenada Çempionlar Liqası abı-havası hiss olunmurdu. Yarımhəvəskar "Linkoln" və qarşılaşmanın səviyyəsinə uyğun referi təyinatı... Sönük, sürətsiz, baxımsız keçən matçda 5-10 dəqiqədən bir xırda follar qeydə alınır, ara-sıra baş hakimin qərarlarına yerli futbolçular narazılığını bildirirdi. Bəzi hallarda haqlı idilər. Oyunun ilk dəqiqələrində, sadə epizodda yerli komandanın əleyhinə qərarı cərimə meydançası daxilində baş verdiyinə görə VAR müdaxilə etmək məcburiyyətində qaldı. Mübahisəli hakim qərarına monitor qarşısında baxılması tövsiyə olundu. Referi epizoda baxandan sonra səhvə yol verdiyini görərək, əks tərəfə cərimə zərbəsi təyin etdi. Havanın isti olması, süni qazon, ev sahibi komandanın qapalı oynaması, tempin, sərt mübarizələrin olmaması hakimlər briqadasının işini yüngülləşdirirdi. Ancaq əks-hücumlar zamanı bir qədər sürət artır, referinin işi nisbətən çoxalırdı. Hakimlik adına çox asan keçən görüşdə elə bir diqqətçəkən məqam yaşanmadı. Fərq ancaq meydanda olan komandaların səviyyəsində idi ki, bu da artırılmış vaxtın son dəqiqəsində özünü göstərdi. "Qarabağ" təcrübəsi hesabına cavab görüşü ərəfəsində vacib qələbəni təmin etdi. Uğur olsun!"
ABDULLA İSMAYILOĞLU
Digər xəbərlər
