"Qarabağ"a qarşı açıq futbol oynamaq cinayətdi"
Misli premyer-liqasında 13-cü tura yekun vurulub.
"Football-plus.az" xəbər verir ki, "Qarabağ" "Səbail"i məğlub edib - 3:1. Matçdan sonra "dənizçilər"in çalışdırıcısı Şahin Diniyevin mətbuat konfransı keçirilib. Sizi onun fikirləri ilə tanış edirik:
"Bu gün oyuna hücumçusuz başladıq. İstəyirdik ki, ilk dəqiqələrdə "Qarabağ"ın təzyiqinin qarşısında dayanaq, tez qol buraxmayaq. Qol tez oldu. Pedro Nuno epizoddan yararlanıb qol vursaydı, başqa cür olardı. "Qarabağ"ı qələbə münasibəti ilə təbrik edirəm. Gözləmirdik ki, onlar meydana əsas heyəti ilə çıxacaq. "Qarabağ"ın bu heyətinə qarşı oynamaq nəinki bizə, Avropanın aparıcı klublarına çox çətindi. "Qarabağ"a qarşı açıq futbol oynamaq təhlükəlidi, cinayətdi. Amma oyunun nəticəsi bizə bunu məcbur etdi. Açıq futbol oynamağa çalışdıq, qol da vurduq, yenə vura bilərdik, buraxa da bilərdik. Səlahət Ağayev bu gün qapıda möhtəşəm idi. Futbol oynamağa çalışdıq. Fasilədə oyunçulara dedim ki, itirəcəyimiz bir şey yoxdu, qazanacağımız nəsə ola bilər. Rotasiya etməyə imkan yox idi. İlk yarıya hücumçumuz çıxdıq. Ona görə ilk yarıda hücumda oyunumuzu tuta bilmədik. Fasilədən sonra komanda yaxşı və məzmunlu oynadıq. İrəli baxmalıyıq. Qabaqda çox vacib oyunlarımız var. Çempionat maraqlı gedir, biz düz yoldayıq, bu yola da davam edəcəyik".
- Yusif Nəbiyev ən zəif oyununu oynadı. "Qarabağ" daha çox onun cinahından hücumlar edirdi. İkinci yarıda gözlənilirdi ki, o cinahı bağlayasız, amma olmadı...
- Düz buyurursuz. Amma futbolçunun yaxşı günü də olur, pis günü də. Süleyman Əhmədov meydana zədəli çıxmışdı. Cabir Əmirli əməliyyat olunub, yoxdur. Adil Nağıyev də zədəlidi. Müdafiədə itkilərimiz yetərincədi. Vüqar Həsənov əməliyyatdan yeni çıxıb. Axırda məcbur olub mərkəz müdafiəçisini o mövqedə oynamaq üçün buraxdıq. Halbuki, heç vaxt orda oynamayıb. Yusif də kiçik zədə və iynə ilə oynayırdı. Amma rotasiya etməyə, oyunu dəyişmək üçün heyətimiz yoxdu. Yadin Luqasi hücumameyilli yarımmüdafiəçidi, ancaq onu sağ cinah müdafiəçisi kimi oynatdıq. Bunlar hamısı yoxluqdan və məcburiyyətdən idi. Zədəlilər qayıtdıqdan sonra daha məzmunlu və daha yaxşı "Səbail" görəcəyik.
- Ehtiyat qüvvənin olmaması sizə nə dərəcədə çətinlikr yaradır?
- Hazırkı durum budu. Komanda birdən-birə birinci yeri tuta bilməz. Bu zamanla olacaq. Hər üç, hər altı aydan bir baxacağıq ki, boşluqlarımız hardadı. "Səbail"in birdən-birə çempionluğa oynamasını heç kim başa düşməz. Büdcə var, ona uyğun hərəkət etməliyik. Pulumuz var deyə, hər şeydən istifadə etmək də düzgün deyil. Savadlı xərcləməliyik. Bizdən 10 nəfər milliyə dəvət edilir. Klub halında biz varıq, klub yaranır. Addım-addım bunları etməliyik. Rüfət Abdullazadə də əsas milliyə düşməyə yaxındı, U-21 yığmasında da təmsil olunuruq. Bu klubun təməlinin qurulması deməkdi. Əvəzedicidən əsas komandaya oyunçular gəlir. Yetişdirmək lazımdı. Bununla bərabər, nəticələr də olmalıdı. Heç kim kimi yetişdirməyinə qiymət verməyəcək. Amma biz vicdanla işləmək istəyirik. Qışda boşluq olan mövqeləri yerləri dolduracağıq.
- Komandanı mövsümün sonunda hansı pillədə görürsüz?
- Hansı cavabı versəm, düzgün olmaz. Futbol proqnozu sevməyən oyundu. Ancaq komandanın potensialı var. Bizim qarşımızda "altılığ"a düşmək vəzifəsi dayanıb. Ondan sonra nə qədər irəliləyə biləcəyik, gedəcəyik. "Səbail" futbol oynamağı bacaran komandadı. Potensiallı, istedadlı oyunçularımız çoxdur. Hər komanda ilə oyunda qol epizodu yarada bilirik. Yeganə komandayıq ki, 13 oyunun hər birində qol vururuq. Deyə bilərlər ki, çox da qol buraxırıq. Amma çoxluqla irəli gedirsənsə, qol da buraxacaqsan. Lakin prinsiplərimizdən əl çəkməyəcəyik. Çox qol buraxırıq deyə, dayanaq arxada, xeyr. Bu da olmayacaq. "Qarabağ"la matçda da irəli atıldıq, olsun 2:5, 3:6, 4:7, fərqi yoxdu. Bu oyun artıq itirilmişdi. "Qarabağ"ın bu heyətinə qarşı oynamaq Avropa komandaları üçün də çətindi. Potensialımız var, komanda yaxşı yerlərdən birini tutacaq.
Digər xəbərlər
