Dünən "Qəbələ”nin U-19 komandası Gənclər Liqasının 2-ci mərhələsinin ilk oyununda evdə “Olimpiakos”a 0:3 hesabıyla uduzdu.

“Qırmızı-qaralar”ın baş məşqçisi Famil Xəlilov oyundan sonra "Football-plus.az"ın suallarını cavabladı...

- Oyun haqda nə deyə bilərsiz?
- Rəqibi təbrik edirəm. Futbolçularıma alqış düşür. Bu görüşdə 0:3 hesabıyla məğlub olmalı deyildik. Tam üstün futbol oynadıq. Lakin onlar epizodları dəyərləndirə bildilər, bizim isə şansımız gətirmədi. Oyunun əvvəlindəki penalti epizodu futbolçularımda ruh düşkünlüyü yaratdı. Lakin sonradan toparlana bildik. Futbolçularıma təşəkkür edirəm, əllərindən gələni etdilər. Hətta deyərdim ki, macarlarla səfər oyunundakından daha yaxşı təsir bağışladılar. Alqışalayiq futbol sərgilədilər.

- Bu görüşdə qapınıza iki penalti təyin edildi. Nə baş verirdi?
- Müdafiədə səhvə yol verdik. Lakin sonradan toparlana bildik. Özəlliklə ikinci hissədə kifayət qədər hücum təşkil etdik. Sadəcə, sonluq çatmırdı. Amma futbolçularımın özünə inanmaları xoşuma gəldi. Bu onların böyük futbola tez uyğunlaşacağından xəbər verir. Hər birinə inanıram və çox güvənirəm. Ümid edirəm ki, növbəti matçlarda bu səhvləri etməzlər.

- Rəqibin baş məşqçisi müsahibəsində bildirdi ki, hələ heç nə bitməyib. Sizcə, o, fikirlərində səmimidi?
- Təbii ki, haqlıdı. Mən də olsaydım, eyni düşüncədə olardım. Çünki 0:3 hesabıyla uduzmağımıza baxmayaraq, bizim təhlükəli hücumlarımız daha çox idi. Bu səbəbdən rəqib tam da rahat danışmaq istəmir. Bu futboldu, hər şey ola bilər. Futbolçularımın sağlamlığında hansısa problem olmasa, Pireyə tam heyətlə yollansaq, nəticə əldə edə bilərik.

İLKİN SULTANLI