İlk beş turun nəticəsi “Qəbələ”yə təsir edib

“Qəbələ”nin qapıçısı Rəşad Əzizli məğlubiyyətdən sonra üzgün görünsə də, “Football-plus.az"ın bəzi suallarını cavabladı.

- Bu gün rəqib qapısı önündə çoxlu qol vəziyyəti yaratdız. Lakin bunların heç birini dəyərləndirə bilmədiz. Bunu nə ilə əlaqələndirərdin?
- 90 dəqiqə ərzində ərazi üstünlüyü bizdə idi. Lakin adi epizodddan qol buraxdıq. Vurmayana vurarlar. Hücumda çox fəaldıq. Təəssüf ki, bundan istifadə edə bilmədik və uduzduq.

- Hər kəs “Qəbələ”nin qayıtdığını düşündüyü anda “Səbail”ə məğlub olduz…
- Düzdü, oyun planında inkişaf var idi. Hətta hamı gördü ki, bu qarşılaşmada da yaxşı oynadıq. Ancaq bu futboldu və hər şey ola bilər.

- Birinci dövrə komanda üçün yaxşı olmadı. İkinci dövrədə toparlana biləcəksizmi?
- Özümüzə gec gəldik. İlk 5 tur bizim üçün uğurlu keçmədi. Bu da komandaya pis təsir elədi. Düşünürəm ki, ikinci dövrə daha yaxşı olacaq. Artıq oyun planı bəllidi, oyunçular bir-biri ilə anlaşa bilir. İnşallah, yaxşı olacaq.

- Milli fasiləsindən sonra “Araz-Naxçıvan”la qarşılaşacaqsız.
- “Araz-Naxçıvan” da hazırda yaxşı formada olan komandadı. Çətin oyun olacaq. Bu dəqiqə premyer-liqada çıxış edən bütün rəqiblər çətindi. Və bu matçı evdə keçirəcəyik. Ona görə də qələbə qazanmaq məcburiyyətindəyik.

CAVİD ƏLİYEV