Famil Xəlilov münasib rəqib arzulayır
U-19 liqasında çempionun adı bəllidi.
“Qəbələ” rəqiblərini üstələyərək mövsümün qalibi oldu. Bununla da bölgə təmsilçisi UEFA Gənclər Liqasında oynamaq hüququ qazandı. Görəsən, “qırmızı-qaralar”ın baş məşqçisi Famil Xəlilov komandasından bu mötəbər turnirdə nə gözləyir? Bunu öyrənmək üçün mütəxəssislə danışdıq:
“Təbii ki yenidən U-19 liqasında qalib oldugumuza görə çox sevincliyik. Artıq 7-ci dəfədi ölkəmizi, klubumuzu UEFA Gənclər Liqasında təmsil edəcəyik. Çox məsuliyyətli yarışdı. Bütün ölkələrin çempionları qatılır. Hədəfimiz ən azı bir mərhələ keçməkdi. Bəxtimizə düşəcək rəqib də çox önəmlidi. Ötən mövsüm qarşılaşa biləcəyimiz ən güclü rəqiblə oynadıq. Bu məqam nəticəyə böyük ölçüdə təsir etdi. Çox yaxşı hazırlaşmışdıq, sadəcə, səviyyə fərqi aşkar görünürdü. “Alkmaar” bizdən sonra Fransa və İspaniya çempionunu turnirdən kənarlaşdırdı. Sadəcə, İtalya çempionu “Yuventus”a penalti seriyasında məğlub oldu. İstədiyimiz ilk mərhələdə bərabər səviyyədə rəqibin düşməsidi. Avqustu gözləyirik”.
SƏNƏM FƏRHADOVA
