Dünən qadın voleybolçular arasında ölkə çempionatında yeni mövsümə start verildi. Açılış matçında "Azərreyl" ilə "Abşeron" üz-üzə gəldi. Görüş Famil Ağayevin çalışdırdığı "Abşeron"un qələbəsi ilə başa çatdı - 3:1 (27:25, 23:25, 25:16, 25:20).

Oyundan sonra qalib komandanın əsas siması Ülkər Kərimova "Football-plus.az"ın bəzi suallarını cavabladı.

- Açılış oyununda qalib gəldiniz. Təəssüratın maraqlıdı.
- Sonuncu müsahibəmdə də demişdim ki, ilk oyuna qalib gəlmək üçün çıxacağıq. Meydanın fərqli, həmçinin də ilk oyunumuz olmasına baxmayaraq, əlimizdən gələni edib bu matçı qazandıq. "Azərreyl"in qələbəsini gözləyən adamların kefini pozduq (gülür). Onlara da demək istərdim ki, "Abşeron"a yalnız qələbə yaraşır. Komandamla qürur duyuram.

- Mövsümün iddialı komandalarından biri, avrokuboklarda iştirak edən "Azərreyl" üzərində qələbə qazandız.
- Əlbəttə, əla hissdi. Əsas odu ki, meydanı qələbə ilə tərk etdik. Bu da çempionluğa daha iddialı olduğumuzu göstərir.

- Bəs hansı zonalarınızın hələ də zəif olduğunu düşünürsən?
- İkinci seti rəqibə verməyimiz çox səhv etməyimizə görə oldu. Amma bu çatışmazlıqları aradan qaldıracağıq. Hələ mövsüm qarşıdadı.

- Öz çıxışı necə dəyərləndirərdin? Razı qaldınmı?
- Yalnız bunu deyə bilərəm ki, ilk oyunda komandama yetərincə kömək edə bildim.

CAVİD ƏLİYEV